O PP de Burela carga contra a xestión das praias tras un verán con problemas no socorrismo e nos baños
O PP de Burela fixo balance da tempada estival cunha dura crítica á xestión das praias por parte do goberno local, poñendo especialmente o foco nos problemas que, segundo denuncia, se produciron co servizo de socorrismo, na retirada da bandeira azul da praia urbana e nas deficiencias detectadas nos baños públicos da Marosa.
Os concelleiros populares consideran que o sucedido durante os últimos meses volveu poñer de manifesto o que cualifican como as "tres constantes" do actual mandato: "a inoperancia, a falta de xestión e a preocupante falta de transparencia cos veciños e visitantes".
Unha das principais críticas céntrase no servizo de salvamento e socorrismo, cuxa xestión foi asumida directamente este verán polo Concello. Segundo o PP, non se conseguiu dispoñer dos efectivos suficientes para ofrecer unha cobertura adecuada tanto na Marosa como, especialmente, na praia urbana.
A formación asegura ter recibido queixas de usuarios que advertiron de que, durante determinadas xornadas, o posto de socorrismo da praia urbana permaneceu sen profesionais durante parte do día. Os populares sosteñen ademais que, ante esta situación, houbo bañistas que tiveron que reaccionar fronte a diferentes incidentes pola ausencia de persoal.
Para o PP, trátase dunha cuestión especialmente preocupante por afectar directamente á seguridade dos usuarios das praias.
Críticas pola retirada da bandeira azul
Os populares relacionan a falta de efectivos coa retirada da bandeira azul da praia urbana, unha decisión que, segundo sosteñen, se produciu ao non poder garantirse as condicións esixidas para manter este distintivo.
O PP lembra tamén que no anterior mandato Burela perdera a bandeira azul da praia de Ril e considera que os problemas deste verán supuxeron un novo retroceso na xestión dos areais.
A formación cuestiona, ademais, que durante boa parte da tempada estival a bandeira azul permanecese izada na praia urbana mentres, segundo a súa versión, non estaba garantida en todo momento a cobertura necesaria do servizo de socorrismo.
"Os veciños e os visitantes teñen dereito a coñecer a realidade e a recibir información clara sobre os servizos que se están prestando nas nosas praias", manifestaron os concelleiros populares, que reclaman unha maior transparencia por parte do goberno municipal.
Os baños da Marosa, de novo no centro das queixas
O balance do PP esténdese tamén aos baños públicos da praia da Marosa. A pesar das obras realizadas nas instalacións, os populares aseguran que durante o verán volveron producirse queixas polo seu estado de limpeza e por problemas puntuais relacionados coa iluminación, a falta de auga e outras deficiencias.
Desde a formación consideran que estas incidencias demostran que a realización de obras debe ir acompañada posteriormente dun mantemento e dunha xestión continuada das instalacións para garantir que os servizos funcionen correctamente.
Os populares amplían as súas críticas ao conxunto da xestión municipal e consideran que, transcorridos máis de tres anos do mandato, continúan pendentes problemas básicos do municipio. "Nalgún pleno incluso se nos trasladou que había que tomarse as cousas con calma. Pois ben, pasaron máis de tres anos e os veciños seguen esperando, unha clara evidencia de que calma si que están a ter", ironizaron.
"A xestión dun Concello non consiste en facerse fotografías nin en anunciar continuamente actuacións. Consiste en que os servizos funcionen, en anticiparse aos problemas, en manter as instalacións municipais en condicións e, sobre todo, en dar respostas aos veciños", engadiron.
Para o PP, os problemas denunciados no socorrismo, a retirada da bandeira azul e as incidencias nos baños da Marosa son exemplos dunha xestión municipal que cualifican de "improvisación e ausencia de planificación".