O PP de Burela acusa o goberno local de novas irregularidades na tramitación do contrato do SAF
O Grupo Municipal Popular de Burela volveu poñer o foco na xestión do Servizo de Axuda no Fogar (SAF) e advertiu dunha "posible nova irregularidade" na tramitación do expediente para contratar o servizo. As críticas chegaron despois do pleno extraordinario celebrado este mércores, convocado, segundo denuncia o PP, con menos de 24 horas de antelación.
Os populares sosteñen que o Tribunal Administrativo de Contratación Pública da Comunidade Autónoma de Galicia (TacGal) reclamou documentación ao Concello a raíz dunha reclamación relacionada coa licitación. O portavoz municipal do PP, Manuel Rouco, considera que esta situación se suma ás "continuas anomalías na xestión" que o seu grupo leva denunciando durante o actual mandato.
A controversia parte dunha reclamación presentada por CCOO contra os pregos da licitación do SAF, ao considerar o sindicato que poderían vulnerar dereitos laborais das persoas traballadoras. O PP utiliza esta actuación sindical para cuestionar a xestión realizada polo executivo municipal durante os últimos anos.
Rouco asegura que o contrato que regulaba o SAF venceu hai preto de dous anos e cualifica de "ilegal" a situación na que se estaría prestando actualmente o servizo. Trátase dunha valoración do Grupo Popular, que tamén critica que, durante este período, o goberno encabezado por Carmela López non lograse, segundo a súa versión, preparar unha nova documentación axustada á normativa.
CRÍTICAS AO DESENVOLVEMENTO DO PLENO
O PP tamén cargou contra a actuación da alcaldesa durante a sesión extraordinaria. Os concelleiros populares aseguran que López interrompeu en varias ocasións a intervención de Rouco e consideran que intentou dificultar que o portavoz puidese desenvolver os seus argumentos.
Outro dos puntos cuestionados pola formación foi un informe técnico incorporado ao expediente que se remitirá ao TacGal para responder ás reclamacións sindicais. Segundo o PP, o documento presentado durante o pleno non estaba asinado, mentres que a alcaldesa indicou durante a sesión que ela era a persoa competente para facelo.
Para os populares, tanto a tramitación do expediente como o sucedido no pleno volven poñer en cuestión a maneira de xestionar do executivo local. O grupo chega a cuestionar a continuidade de López á fronte do Concello e sostén que os últimos acontecementos deberían levar á veciñanza a preguntarse "se esta é a persoa axeitada para que siga a gobernar a nosa vila".