O Goberno supervisa en Barreiros as obras de urxencia na N-634 tras os temporais
O delegado do Goberno en Galicia, Pedro Blanco, supervisou en Barreiros as obras de emerxencia que o Ministerio de Transportes e Mobilidade Sostible está a executar na N-634 para reparar os danos provocados polos últimos temporais. Acompañárono a subdelegada do Goberno en Lugo, Olimpia López; a alcaldesa de Barreiros, Ana Ermida; a segunda tenente de alcaldesa, Carmen Veiga; e responsables da Demarcación de Estradas do Estado en Galicia.
Blanco destacou que estes traballos forman parte dun despregamento histórico de medios técnicos e humanos en toda Galicia, cun investimento na provincia de Lugo de arredor de 9 millóns de euros, dos que máis de 3,3 millóns corresponden ao sector LU-02, que inclúe Barreiros. As actuacións céntranse no fresado e reposición do firme nos tramos máis deteriorados para mellorar a circulación e reforzar a seguridade viaria.
O delegado subliñou que o Plan Especial mobiliza 38 millóns de euros extraordinarios e, xunto co investimento ordinario, permitirá en 2026 alcanzar un máximo histórico de 167 millóns de euros na conservación das estradas do Estado en Galicia. Este plan permitirá actuar en preto de 2.000 puntos, asfaltando 262 quilómetros, intervindo sobre 1,2 millóns de metros cadrados e estendendo máis de 260.000 toneladas de asfalto, con arredor de 200 operarios, 75 máquinas e 60 camións, reforzando a cohesión territorial e a actividade económica.