O Festival Aturuxo regresará a Bravos con música tradicional, foliada e dous históricos do seu escenario
Bravos, no concello de Ourol, volverá converterse este verán nun punto de encontro para a música tradicional, a festa popular e a convivencia coa celebración da décimo cuarta edición do Festival Aturuxo. O evento terá lugar os días 17 e 18 de xullo e manterá a súa aposta por combinar cultura, foliada e tradición nun ambiente aberto ao público, con entrada e zona de acampada gratuítas.
A organización, a cargo da asociación Aturuxeiros de Ourol, continúa avanzando os primeiros nomes do cartel desta nova edición, que promete recuperar o espírito das grandes verbenas e dos encontros arredor da música de raíz galega.
Entre as actuacións xa confirmadas atópase Tumba e Dalle, formación que o pasado ano participou na presentación do festival e que deixou unha forte pegada entre o público asistente. Desde a organización destacan a capacidade do grupo para transformar cada actuación nunha auténtica festa popular, mesturando música tradicional, baile e foliada cun estilo que encaixa plenamente coa filosofía do Aturuxo.
Outro dos nomes anunciados é A Banda de Balbina, un grupo moi recordado polos seguidores do festival tras a súa participación en 2015. Segundo explican desde a organización, durante anos foron numerosas as persoas que solicitaron o regreso da formación, converténdose nun dos retornos máis esperados desta edición.
A Banda de Balbina regresará en xullo cun espectáculo no que non faltarán a música, o humor e o ambiente festivo que caracterizan os seus concertos. Desde o festival destacan que a banda forma xa parte da historia do Aturuxo e confían en que a súa volta permita revivir unha desas noites que permanecen na memoria do público.
Ademais da programación musical, o Festival Aturuxo mantén o seu compromiso coa difusión da cultura popular e dos xogos tradicionais, reivindicando as raíces e o carácter comunitario dunha celebración que cada ano reúne a centos de persoas en Bravos.
A organización continúa tamén facendo un chamamento a grupos de música tradicional interesados en participar na xornada do venres 17 de xullo, co obxectivo de seguir ampliando unha programación centrada na música de raíz e na participación colectiva.