O espectáculo “Hamelín” de Fran Rei chega a Alfoz polo Día do Libro
O Concello de Alfoz conmemorará o próximo 23 de abril o Día do Libro cunha proposta cultural dirixida a todos os públicos: o espectáculo “Hamelín”, do actor Fran Rei.
A actividade combina narración oral, maxia, música e humor para ofrecer unha revisión actualizada e inclusiva da coñecida lenda do frautista de Hamelín, achegándoa a unha mirada contemporánea.
A función terá lugar ás 15:00 horas na Casa da Cultura de Alfoz, cunha duración aproximada de 50 minutos. Trátase dunha proposta pensada para o público familiar, que busca fomentar a reflexión a través dunha historia chea de imaxinación.
Dende a organización destacan que o espectáculo aborda valores como a diversidade, a responsabilidade e a importancia de mirar máis alá das diferenzas, converténdose nunha actividade cultural especialmente orientada á celebración do Día do Libro.