O CSIC comeza a cartografar o castro de Punta do Cabo para descubrir a súa estrutura
O Concello de Burela anunciou o inicio da primeira fase dos traballos de investigación no castro de Punta do Cabo, un proxecto que permitirá avanzar no coñecemento deste enclave arqueolóxico a través de técnicas de estudo non invasivas. Tras manter varios encontros informativos coa veciñanza, o equipo investigador do Consello Superior de Investigacións Científicas (CSIC) xa comezou as tarefas de prospección sobre o terreo.
Esta intervención ten como finalidade obter información precisa sobre a configuración e a extensión do castro sen realizar escavacións nin modificar o estado actual do xacemento. Os datos recompilados servirán como base para coñecer mellor un espazo que ata o momento non foi estudado mediante metodoloxía científica e para definir futuras actuacións arqueolóxicas en función dos resultados obtidos.
Os traballos serán desenvolvidos polo Instituto de Ciencias do Patrimonio, pertencente ao CSIC, que recorrerá a diferentes ferramentas tecnolóxicas para analizar o subsolo e documentar o enclave. Entre elas figuran voos con drons, que facilitarán a localización das estruturas do castro desde o aire, así como prospeccións xeofísicas destinadas a detectar elementos soterrados mediante a análise das variacións do campo magnético terrestre.
A investigación completarase coa elaboración dunha documentación gráfica e dunha modelación tridimensional dos elementos patrimoniais vinculados ao xacemento, entre eles os petróglifos existentes na zona, co obxectivo de rexistrar con precisión o seu estado de conservación e o seu contexto arqueolóxico.
A alcaldesa de Burela, Carmela López, agradeceu o labor que está a desenvolver o equipo científico encargado do estudo e expresou a súa confianza en que esta investigación permita ampliar o coñecemento sobre un dos espazos patrimoniais máis singulares do municipio, ao tempo que manifestou o seu interese por coñecer as conclusións que se obteñan ao remate desta primeira fase.