O Conservatorio de Viveiro achega a música aos máis pequenos coa súa Aula Infantil
O Conservatorio de Viveiro abre a preinscrición para o Curso Preparatorio-Aula InfantilO Conservatorio de Viveiro abre a preinscrición para o Curso Preparatorio-Aula Infantil
O Conservatorio Profesional de Música de Viveiro abriu o prazo de preinscrición para o Curso Preparatorio-Aula Infantil, unha proposta destinada aos nenos e nenas nacidos no ano 2019 coa finalidade de facilitarlles un primeiro contacto coa música dun xeito lúdico e adaptado á súa idade.
As clases estarán orientadas a desenvolver capacidades musicais básicas como o oído e o sentido do ritmo a través de xogos e diferentes actividades. Deste xeito, o alumnado poderá achegarse á aprendizaxe musical de forma amena ao mesmo tempo que potencia estas habilidades.
O programa servirá tamén para descubrir as diferentes posibilidades formativas que ofrece o Conservatorio de Viveiro. Ao longo do curso, os participantes coñecerán os instrumentos que poden estudar posteriormente no centro, facilitando que, chegado o momento, poidan escoller unha especialidade instrumental cun maior coñecemento das distintas opcións.
A matrícula poderá formalizarse os días 23, 24 e 25 de setembro. O seu importe será de 33,64 euros, aos que se engadirá unha cota mensual de 10,27 euros.
As familias interesadas en ampliar a información sobre o Curso Preparatorio-Aula Infantil poden contactar co Conservatorio Profesional de Música de Viveiro a través do teléfono 982 560 486.