O Conde Santo e a faba únense no cartel da XXXIV Festa da Faba de Lourenzá
A XXXIV Festa da Faba de Lourenzá xa ten imaxe. O artista local Francisco Piña Balboa, coñecido como Chis, é o autor do cartel desta nova edición, unha composición na que a faba comparte protagonismo coa figura do Conde Santo e que nace dunha estreita relación co patrimonio da localidade.
A presentación contou coa participación do creador, da alcaldesa, Rocío López, e do concelleiro de Cultura, Manuel Arango. Desde o Concello destacaron a elección dun artista laurentino para representar unha das celebracións gastronómicas máis importantes do municipio e reivindicaron a oportunidade de dar visibilidade á creación feita na propia localidade.
DUN PROXECTO PARA O BELÉN AO CARTEL
A orixe da obra está nun proxecto persoal de Chis Piña Balboa que, inicialmente, nada tiña que ver coa Festa da Faba. O artista tiña previsto realizar no futuro unha figura para o Belén da igrexa inspirada na imaxe do Conde Santo que aparece na fachada do templo.
Para poder estudar a escultura con maior detalle, a súa filla realizou fotografías aéreas cun dron. A partir destas imaxes, Piña Balboa elaborou unha ilustración a plumilla que posteriormente tratou de maneira dixital.
Foi durante este proceso cando decidiu incorporar á composición plantas e ramas de fabas, establecendo unha conexión directa coa celebración gastronómica. "A imaxe do Conde Santo que aparece na fachada non é demasiado coñecida e pareceume unha boa oportunidade para recuperala e incorporala ao cartel", explicou.
O resultado combina así dous elementos estreitamente vinculados con Lourenzá: o seu patrimonio e o produto que protagoniza cada ano a festa.
A alcaldesa, Rocío López, destacou "a importancia de poñer en valor o talento que temos na nosa terra e ofrecer espazos para que os nosos creadores poidan amosar o seu traballo". Pola súa banda, Manuel Arango incidiu en que a Festa da Faba permite tamén reivindicar a cultura e a capacidade creativa da comunidade local.
O Concello considera que a proposta consegue unir patrimonio, tradición e produto local nunha mesma imaxe, recuperando ademais un elemento da igrexa que resulta pouco coñecido. A XXXIV edición contará deste xeito cun cartel que non só foi realizado por un artista de Lourenzá, senón que nace directamente da súa relación coa historia e as tradicións do municipio.