O Concello de Ribadeo ofrece poda gratuíta de palmeiras para o XI Ribadeo Indiano
O Concello de Ribadeo puxo en marcha unha iniciativa coa que ofrece de maneira gratuíta a poda de palmeiras situadas en propiedades privadas, co obxectivo de obter follas que serán empregadas na ornamentación da vila durante o XI Ribadeo Indiano.
O concelleiro de Medio Ambiente, Diego Dos Santos, explicou que o municipio xa se atopa na conta atrás para unha das celebracións máis destacadas do verán ribadense, un evento que cada ano require unha grande cantidade de follas de palmeira para a decoración dos espazos públicos.
As persoas que conten con palmeiras nas súas fincas e precisen realizar a poda poderán solicitar este servizo municipal chamando ao teléfono das oficinas do Concello, o 982 120 701. O prazo de solicitude estará aberto do 30 de xuño ao 3 de xullo, e será persoal municipal quen se encargue de executar os traballos nos días seguintes.
Dos Santos destacou que esta colaboración permite, por unha banda, garantir o material necesario para a ambientación do evento e, por outra, ofrecer un servizo útil á veciñanza sen ningún custo.
Así mesmo, o edil agradeceu de antemán a participación dos veciños e veciñas de Ribadeo, subliñando que esta implicación contribúe a manter a estética característica do Ribadeo Indiano, unha celebración que terá lugar entre o 10 e o 12 de xullo e que cada ano reúne a numerosos visitantes.