O Concello de Cervo presenta o seu calendario 2025 destacando o deporte local
O Concello de Cervo está facendo chegar aos fogares do municipio o seu tradicional calendario de 2025 para felicitar as Festas. Este ano, a publicación está dedicada aos clubs e entidades deportivas que contribúen a encher de vida as diferentes parroquias, nunha homenaxe ao esforzo e á paixón que cada colectivo pon nas súas actividades.
O mes de xaneiro está ilustrado polos Cabaleiros da Bidueira, unha asociación de recente creación que reúne veciños e veciñas cunha forte paixón polo mundo ecuestre. Este colectivo destaca pola súa implicación na dinamización da pista habilitada na Bidueira, onde organizan diversos eventos ao longo do ano, convertendo o espazo nun punto de encontro para os amantes dos cabalos e para a veciñanza en xeral.
Con este calendario, o Concello de Cervo quere recoñecer o labor de todas as entidades deportivas que fan posible que o deporte e as actividades comunitarias sigan a ser un piar fundamental no municipio.