O Concello de Burela suspende mañá a recollida do lixo e a limpeza viaria por San Martiño de Porres
O Concello informa de que mañá, martes 3 de novembro, quedarán suspendidos os servizos de recollida de residuos, limpeza viaria e xestión do punto limpo con motivo da celebración de San Martiño de Porres, patrón do sector da recollida de lixo.
O concelleiro de Obras e Benestar Comunitario, Ramiro Fernández Rey, pediu á cidadanía que teña presente esta modificación á hora de depositar os residuos para evitar acumulacións e posibles molestias. O edil incidiu na importancia da colaboración veciñal para garantir o correcto funcionamento dos servizos municipais.
A actividade recuperarase con normalidade a partir do mércores 4 de novembro, segundo comunicou o Concello, que agradece de antemán a comprensión e participación da veciñanza.
O Goberno local lembra que respectar este cambio puntual contribuirá a manter os espazos públicos en boas condicións e a conservar a limpeza do municipio durante a xornada festiva.