O Concello de Burela renova a Escola Infantil Vista Alegre cun investimento de máis de 40.000 euros
A Escola Infantil Vista Alegre de Burela está a experimentar unha renovación significativa coa segunda fase do proxecto de mellora da súa fachada exterior, cun investimento que supera os 40.000 euros.
Segundo explicou o concelleiro de Obras, Ramiro Fernández Rey, “as obras eran moi necesarias, xa que o edificio presentaba deficiencias na envolvente exterior que provocaban unha perda importante de enerxía e incomodidades para os nenos e nenas matriculados, atendendo tamén ás demandas formuladas pola dirección do centro nos Consellos Escolares”.
Este proxecto enmárcase nunha política municipal de cofinanciamento co Consorcio Galego de Benestar, que en 2024 permitiu investir 67.000 euros en melloras nas dúas escolas infantís do municipio. Cada ano, o Concello achega ao Consorcio 900 euros por cada praza ocupada, o que no curso pasado supuxo máis de 120.000 euros destinados a garantir o funcionamento destes centros.
Deste montante, 43.500 euros reinvestíronse na Escola Infantil Vista Alegre para mellorar o illamento térmico, mentres que outros 23.000 euros foron destinados á Escola Infantil dos Castros, incluíndo instalación dunha bomba de calor e mellora do peche perimetral. Ademais, o Concello asume gastos correntes e de mantemento que alcanzan os 20.000 euros anuais.
A alcaldesa de Burela, Carmela López, destacou que “a colaboración entre administracións permite realizar cada ano investimentos de mellora nas escolas infantís, ofrecendo mellores instalacións e servizos ás familias”.
Ademais, este verán a Xunta de Galicia acometeu novas obras de mellora na escola, continuando coa renovación da fachada exterior que se está a realizar por fases e á que se destinan máis de 90.000 euros. O xerente do Consorcio Galego de Servizos de Igualdade e Benestar, Perfecto Rodríguez, comprobou o resultado dos traballos xunto con responsables municipais.
A primeira fase mellorou a zona das aulas 2-3, incluíndo a substitución da carpintería de aluminio, mentres que a nova intervención centrouse na fachada do comedor, prevéndose que a próxima verán se complete coa renovación do resto das aulas. Rodríguez destacou que estas actuacións estanse a realizar durante a época estival para non interferir na actividade escolar e forman parte das melloras que o Consorcio impulsa nas escolas infantís do municipio, con financiamento autonómico e contratación a cargo do Concello.