Ó Compás do Río Ouro consolida o seu proxecto musical e cultural no Valadouro e Alfoz
A Asociación Cultural Ó Compás do Río Ouro celebrou o seu primeiro ano e medio de actividade cun encontro na Casa da Cultura do Valadouro, no que fixo balance do traballo desenvolvido arredor da formación musical e da dinamización cultural nos concellos do Valadouro e Alfoz.
O acto contou coa presenza do deputado Daniel García, que trasladou os seus parabéns ao colectivo, así como de representantes dos concellos do Valadouro e Alfoz e doutras entidades colaboradoras. Durante a xornada repasouse a evolución da banda de música e da escola, dous dos principais eixes da actividade da asociación.
Daniel García destacou o papel que desenvolven as entidades culturais locais na promoción da música e na participación cidadá. Segundo explicou, o asociacionismo ten unha especial relevancia nos municipios de menor tamaño, onde estes colectivos contribúen a manter espazos de aprendizaxe e difusión da música popular e tradicional.
O deputado puxo tamén en valor a función da escola de música, que ofrece á rapazada do Valadouro e Alfoz a posibilidade de formarse en distintas disciplinas sen ter que desprazarse a outras localidades. Ao seu xuízo, este tipo de iniciativas combinan formación e lecer e permiten achegar a actividade cultural á veciñanza.
García incidiu ademais na importancia de manter activo o tecido asociativo para favorecer unha participación cultural que vaia máis alá do papel de espectador. Neste sentido, reafirmou o compromiso da Vicepresidencia da Deputación de Lugo con estas entidades mediante diferentes vías de apoio, entre elas as axudas directas e programas propios como Tradigalu, orientado á promoción das agrupacións de música tradicional e das bandas da provincia.
Precisamente, a través deste programa, a Banda de Música Ó Compás do Río Ouro, dirixida por Pablo Peláez, foi incrementando a súa presenza nos escenarios da provincia. Desde setembro de 2025 participou en diferentes actuacións celebradas en Alfoz, Cangas de Foz, Foz e Guitiriz.
A área provincial de Cultura tamén colaborou coa asociación na organización do Festival de Músicos do Valadouro e Alfoz, celebrado o pasado mes de agosto, unha iniciativa que reuniu a actividade musical vinculada a ambos os municipios.
Mentres consolida a actividade da banda, a asociación prepara xa o inicio do curso 2026/2027 da súa escola de música. O centro conta actualmente con medio cento de alumnas e alumnos e ofrece formación en diferentes especialidades instrumentais.
A oferta inclúe clases de vento metal, vento madeira, percusión, corda, piano, acordeón e guitarra. Deste xeito, Ó Compás do Río Ouro afronta o novo curso mantendo como eixes do seu proxecto a formación musical e a dinamización cultural nos concellos do Valadouro e Alfoz.