O CIT da Pontenova organiza clases de inglés para todas as idades e niveis
O Centro de Iniciativas Turísticas (CIT) da Pontenova pon en marcha unha nova proposta formativa con clases de inglés destinadas a persoas de todas as idades e adaptadas a diferentes niveis de coñecemento do idioma. A iniciativa inclúe tamén preparación específica para os exames oficiais de Cambridge en colaboración co C.I.T.
As sesións desenvolveranse todos os luns no Local das Sociedades e estarán distribuídas en diferentes grupos en función do nivel dos participantes. Segundo a programación anunciada, as clases comezarán o luns 5 de outubro.
Para os niveis Starters, Movers, Flyers e A2 estableceranse dúas quendas, unha de 17.00 a 18.00 horas e outra de 18.00 a 19.00 horas. Pola súa banda, o alumnado dos niveis B1, B2, C1 e C2 terá as clases entre as 19.00 e as 20.00 horas.
A proposta pretende facilitar tanto a iniciación e mellora do inglés como a preparación das persoas que queiran acreditar oficialmente os seus coñecementos a través das probas de Cambridge.
O prezo das clases será de 6 euros por hora para as persoas socias e de 7 euros por hora para as non socias. Para obter máis información, a organización habilitou os teléfonos 647 02 36 92, atendido por Rosa, e 696 09 17 59, por Lucía.
A actividade está organizada polo Centro de Iniciativas Turísticas da Pontenova e conta coa colaboración do Concello da Pontenova.