O Certame de Teatro Afeccionado “O Poto” reúne compañías de Galicia e Zamora en Foz
O Concello de Foz dará inicio este venres, 5 de xuño, á quinta edición do Certame de Teatro Afeccionado José Luis López Lorenzo “O Poto”, unha cita cultural que volverá converter a vila nun punto de encontro para os amantes das artes escénicas. O certame, organizado pola área de Cultura, prolongarase ata o 14 de xuño cun total de seis representacións repartidas entre a Sala Bahía e a Casa da Cultura.
A concelleira de Cultura, Inés López Couto, explicou que esta iniciativa nace coa intención de poñer en valor o traballo dos grupos de teatro afeccionado e de manter viva a memoria de José Luis López Lorenzo, coñecido como “O Poto”, unha figura moi vinculada ao panorama teatral focense.
A programación contará con compañías procedentes de diferentes puntos de Galicia e tamén cun grupo chegado desde Zamora, un feito que, segundo destacou a edil, confirma a crecente proxección dun certame que cada ano recibe máis propostas para participar. López Couto agradeceu a resposta das agrupacións teatrais e sinalou que o elevado nivel das candidaturas obrigou a realizar unha selección especialmente complexa.
O calendario de actuacións arrancará o venres 5 de xuño coa representación de Moito ruído e poucas noces, da Asociación Cultural Teatro Carauta, ás 20.00 horas na Sala Bahía. Ao día seguinte, sábado 6, Fénix Teatro presentará Mamaaá!! na Casa da Cultura ás 20.00 horas. O domingo 7 será a quenda de Unha obra para un pobo, da Asociación Cultural O Bicho da Barra, programada para as 18.30 horas.
A segunda fin de semana abrirase o venres 12 de xuño coa posta en escena de Dona Clara, a cargo do Colectivo Cultural Ollomao, ás 20.30 horas na Sala Bahía. O sábado 13 representarase Deus non quere calderilla, da Asociación The-Sastre, ás 20.00 horas na Casa da Cultura. O ciclo concluirá o domingo 14 con Veredicto, de Cambre Theatro Amador-CAMTHEAM, tamén ás 18.30 horas.
Todas as funcións serán de entrada gratuíta e o público terá un papel destacado na elección dos gañadores, xa que poderá participar co seu voto nas distintas categorías do certame. A entrega de premios está prevista para o sábado 20 de xuño nunha gala que contará coa participación de Lucía Veiga e Marita Martínez como presentadoras.
Desde o Concello animan á veciñanza e aos visitantes a asistir ás representacións e a desfrutar dunha programación que combina comedia, drama e propostas de diferentes estilos, consolidando esta iniciativa como unha das referencias culturais da primavera en Foz.