O Castro de Rueta de Cervo recobra todo o seu esplendor tras unha roza controlada
Hai dous anos, Mariña Patrimonio promoveu unha intervención arqueolóxica non invasiva no Castro de Rueta, en Cervo, que incluíu a eliminación da cuberta vexetal que ocultaba o xacemento. Esta actuación permitiu poñer en valor un dos castros costeiros máis relevantes da comarca, facendo visible a súa estrutura e contorna.
O ano pasado, o Concello de Cervo e os propietarios dos terreos chegaron a un acordo para manter o castro libre de maleza, polo que o Concello levou a cabo a primeira roza. En xuño deste ano, Mariña Patrimonio e o Concello asinaron un convenio polo que a asociación se encarga da xestión periódica da vexetación do xacemento, contando cunha subvención nominativa municipal.
Entre mediados de xullo e comezos de agosto realizouse a última roza con maquinaria lixeira portátil, logrando un resultado que os responsables cualifican de “espectacular”. Agora, o Castro de Rueta volve amosar a súa impoñente estrutura, invitando á veciñanza e visitantes a descubrir un xacemento arqueolóxico cheo de misterio e historia.
O obxectivo de Mariña Patrimonio e do Concello é manter o xacemento cunha capa de vexetación controlada que permita as visitas especialmente na primavera e no verán, cando o Castro de Rueta pode recibir maior afluencia. Segundo os responsables, a conservación periódica favorece tanto a protección do ben patrimonial como a súa difusión cultural.
Merece a pena achegarse ata Cervo para admirar este enclave arqueolóxico, considerado un dos castros costeiros máis emblemáticos non só da Mariña, senón de toda Galicia, e gozar da súa historia e paisaxe única.