O BNG reivindica en San Cibrao un reforzo dos servizos públicos para garantir unha vellez digna
San Cibrao acolleu unha xornada organizada polo BNG para analizar a situación dos servizos sociais e os retos que afronta a atención ás persoas maiores nun contexto de progresivo envellecemento da poboación. O encontro contou coa participación do concelleiro nacionalista en Cervo, David Villares, e da deputada do Parlamento de Galicia e responsable de Política Social do BNG, Olalla Rodil, ademais de numerosos asistentes que compartiron as súas experiencias e reflexións sobre a realidade dos servizos públicos de coidados.
Durante o debate abordáronse cuestións como a atención á dependencia, o servizo de axuda no fogar, os centros de día, as residencias e os recursos destinados ás persoas maiores. Os representantes nacionalistas destacaron que se trata de asuntos que afectan directamente a milleiros de familias e que cobran unha relevancia especial en comarcas como A Mariña, caracterizadas por un acusado avellentamento demográfico.
David Villares incidiu en que o debate sobre os servizos sociais vai máis alá das cifras e das estatísticas, xa que afecta á calidade de vida e á dignidade das persoas. Segundo explicou, garantir unha atención adecuada ás persoas maiores constitúe unha responsabilidade colectiva e unha cuestión de dereitos fundamentais.
O edil cervense aproveitou tamén para referirse á polémica xurdida nos últimos meses arredor do Centro de Día-Residencia de San Cibrao tras a aprobación dunha nova ordenanza de tarifas vinculada á concesión do servizo. O representante do BNG sostivo que a cuestión non se limita ao incremento dos custos para os usuarios, senón que abre un debate máis amplo sobre o modelo de atención e sobre o papel que deben desempeñar os servizos públicos.
Neste sentido, lembrou que a formación xa expresou no pleno municipal as súas reservas respecto ao estudo económico, ao procedemento de licitación e á ordenanza finalmente aprobada. Ao seu xuízo, todo o proceso estivo condicionado pola busca da rendibilidade empresarial, deixando en segundo plano as necesidades das persoas usuarias.
Os nacionalistas defenderon que unha residencia municipal debe funcionar como un servizo público orientado a garantir dereitos e non como unha actividade sometida a criterios de beneficio económico. Por iso, consideran que a prioridade debe ser asegurar unha atención de calidade e accesible para as familias.
Pola súa banda, Olalla Rodil criticou a política da Xunta en materia de dependencia e servizos sociais, denunciando o que cualificou como un progresivo traslado de recursos públicos cara ao sector privado. A deputada advertiu de que esta situación repercute na capacidade do sistema público para ofrecer respostas suficientes ás necesidades crecientes da poboación maior.
Durante a súa intervención, Rodil tamén chamou a atención sobre a carga dos coidados que continúan asumindo moitas familias, especialmente as mulleres, ante as limitacións existentes na rede pública de atención.
Como alternativa, a representante nacionalista presentou a proposta do BNG para crear o Servizo Galego do Benestar, unha iniciativa coa que a formación pretende impulsar unha ampla Rede Pública de Coidados. Segundo explicou, este organismo funcionaría como un sistema público de referencia destinado a garantir a atención, a autonomía persoal e unha vida digna para as persoas maiores e dependentes en toda Galicia.