O BNG insta ao Concello de Ribadeo a reactivar o proxecto de vivendas de alugueiro para a mocidade en Cabanela
O BNG de Ribadeo reclama ao actual goberno municipal que retome e execute o proxecto de construción de vivendas de alugueiro para mozos e mozas na zona de Cabanela. A iniciativa, impulsada polo anterior executivo nacionalista a comezos de 2023, incluía a adquisición de parcelas e inmobles coa finalidade de habilitar nelas apartamentos destinados á mocidade, nun contexto marcado pola crecente dificultade de acceder a un fogar.
O concelleiro do BNG, Martín Graña, anunciou que o grupo presentará no próximo pleno unha moción para instar o equipo de goberno a activar os trámites necesarios e desbloquear un plan que, segundo sinalan, leva dous anos sen avances. “O acceso á vivenda converteuse nun problema moi serio, especialmente para a xente moza”, afirmou. Engadiu que basta “con botar unha ollada a portais como Idealista para comprobar que tamén en Ribadeo estamos a padecer esta situación”.
Graña recordou que o proxecto formaba parte do programa electoral do Bloque, e que durante o seu mandato se deron pasos significativos coa compra de terreos e inmobles en Cabanela. “Non é a solución definitiva, porque sabemos que os concellos teñen marxe limitada, pero si pode ser un punto de partida para mellorar o panorama actual”, explicou.
O grupo municipal confía en que a iniciativa reciba o apoio da corporación ao completo, ao tratarse —din— dun asunto estrutural que condiciona o futuro das novas xeracións. “Se a mocidade non ten garantido un acceso digno á vivenda, resulta moi difícil que poida construír un proxecto de vida aquí, progresar e contribuír ao desenvolvemento de Ribadeo”, concluíu Graña, quen adiantou que esta será “a primeira de varias propostas” en materia de vivenda que presentarán nos próximos meses.