O BNG destaca o papel das familias e do voluntariado nas Escolas Deportivas
As Escolas Deportivas do Concello de Lourenzá cumpren este ano tres décadas de traxectoria, unha efeméride que serve para poñer en valor un proxecto que, segundo destaca o BNG local, transcende o ámbito estritamente deportivo para converterse nun espazo de formación, participación e transmisión de valores para varias xeracións de mozos e mozas da localidade.
A formación nacionalista quixo trasladar os seus parabéns a toda a comunidade deportiva e ás persoas que contribuíron a consolidar unha iniciativa que, ao longo destes 30 anos, se converteu nun referente tanto na Mariña como noutras zonas de Galicia. Para o BNG, o éxito das Escolas Deportivas baséase non só nos resultados acadados nas competicións, senón tamén na capacidade para fomentar o compañeirismo, a convivencia, o esforzo e o compromiso colectivo.
Os nacionalistas consideran que este aniversario é unha ocasión idónea para recoñecer o traballo desenvolvido por alumnado, adestradores, técnicos, patrocinadores, directivos e voluntariado, así como o papel fundamental das familias. Neste sentido, subliñan que nais e pais foron unha peza clave para manter vivo o proxecto ao longo dos anos, contribuíndo a superar dificultades e colaborando activamente para garantir a continuidade das actividades deportivas.
Desde o BNG tamén poñen en valor a proxección exterior que as Escolas Deportivas achegan ao municipio. A portavoz municipal, Belén Fanego, sinala que os éxitos acadados polos equipos e deportistas constitúen unha das mellores cartas de presentación de Lourenzá. Segundo apunta, xunto coa Faba de Lourenzá, forman un binomio que identifica o concello e reforza a súa visibilidade dentro e fóra da comarca.
A formación lembra que a realidade actual é moi diferente á de hai tres décadas e que o crecemento do proxecto implica asumir novos retos organizativos e económicos. Entre as necesidades existentes citan a mellora das infraestruturas deportivas, a adquisición e renovación de material, os desprazamentos a competicións e a organización de actividades e eventos que permitan seguir ampliando a oferta deportiva.
Por este motivo, o BNG considera necesario reforzar o apoio económico destinado ás Escolas Deportivas para garantir a súa continuidade e evolución nos próximos anos. A formación entende que se trata dun servizo fundamental para a sociedade laurentina, polo que defenderá no pleno municipal unha proposta para incrementar a partida orzamentaria dedicada ao deporte e, de maneira especial, ás actividades desenvolvidas polas Escolas Deportivas.
Os nacionalistas confían en que este respaldo permita seguir fortalecendo un proxecto que leva 30 anos contribuíndo á educación, á integración social e á promoción de hábitos saudables entre a mocidade, ao tempo que continúa levando o nome de Lourenzá a numerosas competicións e eventos deportivos.