O BNG de Xove critica o uso de intelixencia artificial sen revisión nas redes sociais do Concello
O BNG de Xove criticou o uso de ferramentas de intelixencia artificial sen unha posterior supervisión dos contidos publicados nas redes sociais oficiais do Concello. A formación nacionalista puxo como exemplo un cartel difundido pola administración local con recomendacións de seguridade para observar a eclipse solar deste mércores 12 de agosto.
A publicación municipal lembra a necesidade de empregar sempre gafas homologadas e advirte dos riscos de mirar directamente ao Sol sen a protección adecuada. Ademais, inclúe un aviso no que se sinalan tres espazos nos que está prohibido contemplar o fenómeno: o Faro Roncadoiro, os Acantilados de Papel, en Morás, e Punta da Mansa.
É precisamente neste apartado onde o BNG centra as súas críticas. Segundo denuncia a formación, as tres imaxes utilizadas para ilustrar estes enclaves non se corresponden cos lugares reais aos que fai referencia o cartel.
Os nacionalistas consideran que este erro evidencia os problemas que pode provocar recorrer á intelixencia artificial para elaborar comunicación institucional sen comprobar posteriormente o resultado. Neste sentido, cuestionan que un contido difundido a través das canles oficiais do Concello chegue á cidadanía sen unha revisión previa que permita detectar este tipo de incorreccións.
Desde o BNG sinalan que a cuestión non reside unicamente no emprego destas novas ferramentas tecnolóxicas, senón na ausencia de supervisión antes de publicar a información. A formación considera especialmente necesario extremar o control cando se trata de comunicacións dunha administración pública e, neste caso, dun cartel que ofrece indicacións á poboación relacionadas coa seguridade durante a observación dun fenómeno astronómico.
“O problema radica en que, se unha persoa está cobrando un salario público, non dedique dous minutos a repasar o cartel”, critican desde o BNG de Xove, que reclama maior rigor na xestión das redes sociais e dos contidos institucionais.
A formación nacionalista aproveita este episodio para abrir tamén o debate sobre o papel que debe ter a intelixencia artificial na comunicación das administracións. “Onde está o límite do uso da IA nas contas oficiais das administracións públicas?”, preguntan desde o BNG.
Os nacionalistas reclaman así unha utilización responsable destas ferramentas e, sobre todo, que os materiais elaborados con elas sexan revisados antes da súa difusión para garantir que a información que chega á veciñanza desde as canles municipais sexa correcta.