O BNG de Viveiro critica que a limpeza dos ríos se deixe para o outono
O BNG de Viveiro critica a planificación do Goberno municipal do PP en relación cos labores de mantemento e limpeza dos ríos e regatos de titularidade municipal. A formación nacionalista cuestiona que o Concello estea preparando estes traballos para o outono, ao considerar que agosto, cando as canles presentan un menor caudal, sería un momento máis adecuado para acometer as actuacións.
A polémica xorde despois de que o BNG reclamase a limpeza do Rego da Trasposta e pedise ao Executivo local que reiterase ante Augas de Galicia a solicitude para actuar tamén no tramo do río Landro ao seu paso por Landrove.
Desde o Goberno municipal explicaron que neste momento se está elaborando a planificación e preparando as propostas de gasto necesarias para poder executar no outono a limpeza dos cursos fluviais que son competencia do Concello. Ademais, puntualizaron que non afirmaron que esa época do ano fose máis adecuada para desenvolver os traballos, senón que se está traballando "con vistas a facelo no outono".
O Executivo local argumenta tamén que durante este mes o risco de inundación é menor debido ao baixo nivel de auga dos ríos. Así mesmo, lembra que antes do verán xa se levaron a cabo actuacións de limpeza en Cantarrana, Covas e outros puntos do municipio, e avanza que despois da época estival se realizarán novos traballos.
O BNG cuestiona a planificación
A explicación municipal non convence ao grupo nacionalista, que considera contraditorio agardar ata unha época na que previsiblemente aumentará o caudal dos cursos fluviais.
"Entón é mellor limpar o río cando ten máis caudal de auga?", pregunta o BNG, que defende aproveitar os meses nos que os ríos presentan niveis máis baixos para realizar estes labores.
Segundo os nacionalistas, "o axeitado sería limpalos agora que levan pouco caudal e que no outono, cando xa empeza a haber máis auga e máis risco de inundacións, os ríos estean limpos".
O BNG enmarca esta situación na que considera unha falta de planificación do Goberno municipal e contrapón a decisión de programar podas durante o mes de agosto coa intención de deixar para o outono parte dos traballos de limpeza dos ríos.
A formación insiste na necesidade de actuar no Rego da Trasposta e reclama que o Concello volva dirixirse a Augas de Galicia para solicitar a intervención no río Landro ao seu paso por Landrove, co obxectivo de que as canles estean acondicionadas antes da chegada dos meses con maior caudal e risco de inundacións.