O BNG de Lourenzá critica o rexeitamento das súas propostas para uns orzamentos de 2026 aínda sen elaborar
O BNG de Lourenzá criticou o rexeitamento por parte do goberno municipal dunha batería de propostas que pretendía incorporar aos Orzamentos Municipais de 2026, unhas contas que, segundo advirte a formación nacionalista, aínda non foron elaboradas cando o ano se achega xa ao seu último trimestre.
As medidas foron levadas ao pleno celebrado este xoves a través dunha moción presentada na parte de control. A iniciativa fora redactada e rexistrada polo BNG no mes de xullo co obxectivo de establecer unha serie de prioridades de investimento para as futuras contas municipais.
A sesión contou cunha orde do día reducida. Na parte resolutiva abordáronse, ademais da aprobación da acta anterior, a fixación dos festivos locais para 2027 e a ratificación da resolución da Alcaldía para adherirse ao convenio de colaboración destinado á xestión compartida do Servizo de Atención Temperá.
A portavoz nacionalista, Belén Fanego, defendeu que a planificación económica municipal debe centrarse nas actuacións con repercusión directa sobre a veciñanza. "A elaboración duns orzamentos responsables exixe priorizar aquelas inversións e actuacións que teñan un impacto directo na calidade de vida dos veciños e veciñas de Lourenzá e que contribúan a mellorar os servizos públicos municipais", sinalou.
Segundo explicou, o propósito do BNG pasa por orientar os recursos cara ao "interese xeral e colectivo", apostando pola igualdade de oportunidades, a seguridade, a accesibilidade, a participación cidadá e o fortalecemento do tecido asociativo.
Entre as medidas propostas figura a compra dun vehículo motobomba para reforzar os medios municipais ante incendios e outras emerxencias. Os nacionalistas consideran que se trataría dun investimento estratéxico para mellorar a capacidade de resposta e incrementar a protección tanto da poboación como do patrimonio.
Outra das prioridades é estender a rede municipal de abastecemento de auga aos núcleos rurais que aínda carecen deste servizo. O BNG lembra que se trata dunha demanda veciñal que xa trasladou ao pleno en anteriores ocasións e considera necesario reservar unha partida específica para avanzar na súa execución.
A moción reclamaba tamén unha planificación para eliminar progresivamente as barreiras arquitectónicas dos edificios municipais. Para os nacionalistas, a accesibilidade universal continúa sendo unha materia pendente e o Concello debe garantir que todas as persoas poidan utilizar os servizos públicos en condicións de igualdade.
O deporte constituía outro dos bloques da proposta. Fanego pediu aumentar os recursos destinados ao mantemento e mellora das instalacións deportivas, ao apoio aos clubs e entidades locais e ao fomento da actividade física entre persoas de todas as idades.
A formación nacionalista puxo igualmente o foco no tecido asociativo. O BNG considera que as entidades culturais, deportivas, veciñais e sociais desempeñan un papel esencial na dinamización de Lourenzá, pero advirte das dificultades que poden ocasionar os trámites administrativos e os atrasos no pagamento das subvencións.
Por este motivo, propuxo incrementar as axudas ás asociacións locais, simplificar os procedementos e axilizar tanto a resolución como o pagamento das subvencións, evitando que as propias entidades teñan que adiantar fondos para desenvolver actividades de interese para a veciñanza.
O BNG sostén que todas estas actuacións responden a necesidades compartidas por unha parte da cidadanía e que son investimentos "útiles, necesarios e asumibles" dentro dunha planificación económica responsable.
CRÍTICAS
A moción, con todo, foi rexeitada polo goberno municipal, unha decisión que Belén Fanego cualificou de "incomprensible e inaudita". A portavoz criticou especialmente que o Executivo local non apoiase unhas actuacións que, segundo asegura, durante o propio debate plenario recoñeceu como necesidades reais.
"Así é imposible que funcione con eficiencia o Concello, cando non se aproban os orzamentos e cando practicamente está rematando o ano", lamentou.
Fanego cuestionou tamén os argumentos ofrecidos pola Alcaldía para votar en contra. "Non é de recibo a resposta que se nos deu desde a Alcaldía ao rexeitar as nosas propostas para os orzamentos argumentando que non se podían comprometer a cumprir os acordos da nosa moción porque non existen cartos para as partidas propostas por nós, aínda que recoñeceron en pleno que as nosas propostas son necesidades reais", concluíu.