Mondoñedo prepárase para un Entroido repleto de festas e premios
O Entroido chega a Mondoñedo cun amplo programa de actividades para todos os públicos. A celebración arrinca o sábado 7 de febreiro co IV Cocido e baile “O Pasatempo” na Finca San Antonio, amenizado polo Dúo Epo-K e o Trío Merengue.
O venres 13 terá lugar a tradicional Cea de Comadres no Círculo Recreativo Casino, mentres que o martes 17 será a quenda dos máis pequenos cos bailes infantís tamén no Círculo.
O punto culminante das festas será o sábado 21, coa saída do gran desfile de Entroido ás 17.30 horas desde o Campo dos Paxariños ata a praza da Catedral. Na praza do Concello celebrarase un baile de disfraces e a entrega de premios, e posteriormente terá lugar o Baile de Piñata no Círculo Recreativo Casino.
Como en anos anteriores, os participantes poderán gañar ata 5.000 euros en premios, mantendo a tradición e a emoción que caracterizan o Entroido mindoniense.