Mondoñedo prepárase para a VII Carreira Monumental, unha cita deportiva que enche de vida o casco histórico
A cidade de Mondoñedo volverá converterse nun auténtico circuíto urbano o sábado 29 de novembro, coa celebración da VII edición da Carreira Mondoñedo Monumental 2025, unha das citas deportivas máis consolidadas e queridas do municipio. O evento, que combina deporte, convivencia e posta en valor do patrimonio histórico mindoniense, reunirá a participantes de todas as idades nun ambiente festivo e saudable.
A entrega de dorsais comezará ás 16:00 horas, e a partir das 18:00 horas dará comezo o programa de competicións. A primeira en saír será a carreira de cativos, destinada a nenos e nenas nados en 2018 e anos posteriores, cun percorrido simbólico de 200 metros, non competitivo, pensado para gozar do deporte en familia.
Ás 18:05 horas correrán os sub-10 (nados en 2016 e 2017) sobre unha distancia de 950 metros, seguidos dos sub-12 (2014 e 2015), que percorrerán 1.900 metros a partir das 18:10 horas. Uns minutos máis tarde, ás 18:25 horas, será a quenda das categorías sub-14 e sub-16 (de 2010 a 2013), cun trazado de 2.850 metros que promete intensidade e emoción.
O prato forte da xornada chegará coa carreira absoluta, prevista para as 18:40 horas, na que poderán participar todas as persoas nadas en 2009 e anos anteriores. O percorrido, de 6.000 metros, transcorrerá polas rúas e contornos monumentais de Mondoñedo, ofrecendo aos corredores unha experiencia única entre o deporte e a historia.
A xornada rematará coa entrega de premios ás 19:30 horas, momento no que se recoñecerá o esforzo de todas as categorías e se celebrará o espírito participativo da proba.