Mondoñedo converterá aos escolares en peregrinos cunha ruta educativa polo Camiño Norte
O Camiño Norte converterase nunha aula ao aire libre para escolares da provincia de Lugo coa nova Ruta XOGADE 2026 – Camiño Norte en Mondoñedo. A iniciativa combinará actividade física, historia, patrimonio e cultura xacobea a través dun percorrido no que os participantes poderán experimentar en primeira persoa o que significa ser peregrino.
A proposta, presentada este xoves no Concello de Mondoñedo, intégrase no programa XOGADE e desenvolverase ao longo de oito xornadas, cada unha delas coa participación dun centro educativo diferente da provincia.
O itinerario deseñado conta con 6,06 quilómetros e 145 metros de desnivel positivo. A saída estará situada na Ermida da Virxe de Guadalupe e, desde alí, os escolares avanzarán por diferentes enclaves relacionados co Camiño Norte e coa historia mindoniense.
Entre as paradas figuran a capela de San Pedro da Torre, San Paio, a Ponte de San Lázaro, a Catedral-Basílica de Mondoñedo, o Convento das Concepcionistas e o Convento de Alcántara. A experiencia rematará no Centro de Interpretación do Camiño Norte e no Albergue de Peregrinos.
UNHA CREDENCIAL PROPIA
Un dos elementos máis singulares será a Credencial Especial Camiño Norte en Mondoñedo, creada especificamente para a actividade. Ao igual que sucede cos peregrinos, os participantes terán que ir conseguindo selos durante a ruta.
En total serán oito, correspondentes aos principais puntos do itinerario. Quen complete o percorrido conseguirá finalmente o distintivo de "Peregrino/a Mindoniense – XOGADE 2026".
Pero a experiencia irá máis alá de camiñar e selar a credencial. En cada parada haberá explicacións e pequenas propostas adaptadas ás idades dos escolares sobre a paisaxe rural, a arquitectura tradicional, o patrimonio relixioso, a historia local e o fenómeno das peregrinacións.
Deste xeito, o Concello busca utilizar o propio Camiño como ferramenta educativa e fomentar simultaneamente o exercicio físico, a convivencia, o respecto polos elementos patrimoniais e o coidado da natureza.
A última parte desenvolverase no Centro de Interpretación do Camiño Norte, onde o alumnado poderá coñecer a historia e o significado do Camiño de Santiago e achegarse á experiencia que supón realizar unha peregrinación.
O técnico municipal de Deportes Raúl González Redondo coordinará a actividade e exercerá como guía durante os percorridos, co apoio de voluntariado para acompañar e controlar os grupos.
Con esta iniciativa, Mondoñedo pretende achegar o seu patrimonio xacobeo ás novas xeracións e reforzar o Camiño Norte como recurso educativo, deportivo, cultural e turístico, facendo que os escolares deixen de ser simples visitantes para converterse en protagonistas da ruta.