Mondoñedo celebrará as festas da Virxe dos Remedios con tres días de música e tradición
Mondoñedo celebrará do 12 ao 14 de setembro as súas Festas Patronais na honra da Virxe dos Remedios, unha das citas tradicionais do calendario local. Durante tres xornadas, a programación combinará as celebracións relixiosas con música, verbenas e actividades de carácter popular.
O programa arrancará o sábado 12 de setembro cunha xornada na que a Orquestra Miramar será unha das grandes protagonistas, encargándose tanto da sesión vermú como da verbena. Ese mesmo día desenvolverase tamén a décimo cuarta edición dos Cantos de Taberna, unha proposta que volverá levar a música e o ambiente festivo a diferentes espazos da cidade.
O domingo 13 estará marcado polos actos na honra da Virxe dos Remedios. Celebrarase a tradicional misa de ofrenda, que nesta ocasión correrá a cargo da alcaldesa de Vilalba, seguida da procesión. A música continuará cun concerto da Banda de Música de Vilalba.
A parte máis festiva da xornada dominical terá como protagonista á Orquestra Salsarena, que actuará tanto na sesión vermú como na verbena.
As celebracións chegarán ao seu último día o luns 14 de setembro coa misa de confrades. A programación completarase cunha sesión vermú a cargo de Suavecito e coa celebración do Día do Neno, reservando así un espazo específico para o público infantil.
As Festas da Virxe dos Remedios volverán reunir deste xeito en Mondoñedo tradición relixiosa, música e convivencia ao longo dunha fin de semana prolongada. A organización corre a cargo da Asociación Cultural Virxen dos Remedios, coa colaboración do Concello de Mondoñedo e da Xunta de Galicia.