MeteoGalicia activa a alerta laranxa no litoral galego por ondas de ata seis metros

MeteoGalicia prevé activar a alerta laranxa no litoral das provincias da Coruña, Pontevedra e Lugo a partir da madrugada deste mércores, 18 de novembro, debido a un episodio de meteoroloxía adversa que traerá forte vento e mar combinada con ondas de entre cinco e seis metros.
Segundo a información meteorolóxica, no noroeste e oeste da provincia da Coruña o aviso estará activo durante toda a xornada do mércores, desde as 00:00 ata as 23:59 horas. Agárdanse ventos do oeste ou suroeste de entre 50 e 61 quilómetros por hora, forza sete, e mar combinada do noroeste con ondas de entre cinco e seis metros.
Na Mariña lucense, a alerta comezará ás 06:00 horas e prolongarase tamén ata as 23:59 horas, coas mesmas condicións meteorolóxicas.
Pola súa banda, no suroeste da Coruña, nas Rías Baixas e no Miño de Pontevedra, o aviso laranxa estará vixente desde as 09:00 ata as 23:59 horas, debido á previsión de mar combinada do noroeste con ondas que poderán acadar entre cinco e seis metros.
Ademais, manterase o nivel amarelo por precipitacións en toda a provincia de Pontevedra e nas zonas oeste, suroeste e interior da Coruña. No interior de Pontevedra prevese unha acumulación de ata 40 litros por metro cadrado en doce horas, nun aviso que estará activo desde as 00:00 ata as 05:59 horas.
Ante esta situación, recoméndase extremar as precaucións, especialmente nas zonas costeiras e nos puntos máis expostos ao vento e á forza do mar, así como seguir as indicacións dos servizos de emerxencia e as actualizacións dos organismos meteorolóxicos.