María Olga Serrano e José Luis Álvarez son candidatos a dirixir a Fiscalía Provincial de Lugo
O Consello Fiscal estudará este venres as candidaturas para cubrir a xefatura da Fiscalía Provincial de Lugo, tras expirar os dous mandatos do fiscal xefe Roberto Brezmes. Á convocatoria concorren dous aspirantes: María Olga Serrano, fiscal delegada de Delitos de Odio da Fiscalía Provincial da Coruña, e José Luis Álvarez, actual tenente fiscal da Fiscalía Provincial de Lugo.
A fiscal xeral do Estado, Teresa Peramato, decidirá que candidatura elevará ao Goberno para o seu nomeamento como fiscal xefe provincial. O nomeamento formalizarase mediante real decreto, publicarase no Boletín Oficial del Estado (BOE) e, unha vez completado este trámite, o novo fiscal xefe tomará posesión do cargo.
María Olga Serrano desenvolve a súa actividade profesional na Fiscalía Provincial da Coruña, onde exerce como fiscal delegada de Delitos de Odio. Ao longo da súa traxectoria asumiu a acusación pública nalgúns dos procedementos penais de maior repercusión mediática e social rexistrados en Galicia nos últimos anos. Entre eles figura o caso Samuel Luiz, relativo ao asasinato do mozo coruñés de 24 anos, ocorrido o 3 de xullo de 2021 tras unha agresión grupal no paseo marítimo da Coruña. A Fiscalía sostivo a acusación por un delito de asasinato e defendeu a aplicación da agravante de discriminación por motivos de orientación sexual.
Tamén exerceu a acusación pública no caso Yoel Quispe, o mozo de 22 anos falecido tras recibir unha puñalada durante unha pelexa na madrugada de Noiteboa de 2023, na Coruña. No xuízo, a Fiscalía cualificou finalmente os feitos como un delito de asasinato, ao considerar que concorrían as circunstancias esixidas para esa tipificación penal. Así mesmo, dirixe a acusación pública no coñecido como caso do loteiro da Coruña, un procedemento cuxos feitos se remontan a 2012 e no que se investiga a presunta apropiación dun boleto de La Primitiva premiado con 4,7 millóns de euros. A Fiscalía mantén a acusación por un delito de estafa ou, alternativamente, de apropiación indebida.
José Luis Álvarez exerce na actualidade como tenente fiscal da Fiscalía Provincial de Lugo e é fiscal delegado de delitos informáticos. Foi fiscal dunha peza separada da chamada Operación Pokemon.
A candidatura elixida pola fiscal xeral do Estado será elevada ao Consello de ministros para a súa aprobación. Unha vez publicado o correspondente real decreto no BOE, o novo fiscal xefe da Fiscalía Provincial de Lugo tomará posesión do cargo, previsiblemente nas semanas seguintes.