Máis de 50 persoas asistiron ao maratón de emprendemento Revolta Rural en Mondoñedo
Este evento estivo promovido polos Grupos de Desenvolvemento Rural Terras de Miranda, Seitura 22 e Montes e Vales Orientais, e organizado pola empresa Rural Talent, xunto co impulso de CaixaBank, dentro do seu proxecto Tierra de Oportunidades.
A Revolta Rural tivo lugar o día 23 e 24 de abril en Mondoñedo, un evento de emprendemento ao que se inscribiron 30 ideas de negocio, dos que a metade daeron solucións a retos en innovación en experiencias e comercialización para o sector turismo; oito proxectos traballaron para a creación de novos negocios en produción, transformación e comercialización agroalimentaria, e os sete restantes foron ideas innovadoras para os sectores forestal, enerxía e servizos á poboación.
A xornada deu comezo ás 11.00 horas no que se presentou de forma oficial o evento e na que os participantes traballaron en desenvolver un plan de empresa, apoiados por seis mentores galegos referentes en innovación, turismo e sustentabilidade, comunicación, e asesoramento legal e en financiamento.
Os devanditos mentores foron Antonio García Lorenzo, profesor da UDC e da Business Factory Food. Clúster Alimentario de Galicia ( CLUSAGA); Julio Sánchez Montoya, xerente de administracións públicas da empresa Valora Consultores; Hugo Fraga Pigueiras, director en Hyliacom; Roberto Alonso, Interim manager Director Financeiro; Itziar V, emprendedora con Twin Shoes e presentadora de Amor na Rede; e Pablo Taboada Villamil, avogado e director de Delvy en Pontevedra.
Á Revolta Rural uníronse tamén empresas referentes dos tres territorios para contar os seus casos de éxito baixo o formato Café con…, onde os participantes puideron coñecer os modelos de negocio de O sabor dos Ancares da Cooperativa A Carqueixa de Cervantes, Laminados Villapol de Trabada, e a Granja Labrada Bed & Horses de Mañón.
Xa o domingo, foi o momento da presentación dos modelos de negocio ante os 6 membros do xurado, composto por responsables de CaixaBank, Rural Talent, Delvy, e a Universidade da Coruña. E mentres o xurado delibera, desde o GDR Terras de Miranda organizaron unha visita guiada por Mondoñedo para mostrar o patrimonio histórico e cultural da Vila.
Á volta da visita celebrouse a entrega de premios onde cada GDR entregou catro premios, un de 2.500 euros que foi para Andrea González; outro de 1.500 para Cintia e Erea; e dous de 500 euros, un para Elvira Posada e outro para Coral Pardo. Ademais tamén foron obsequiados coa participación na Incubadora Revolta Rural durante 6 meses cunha bolsa de mentorización na que estarán acompañados por persoal especializado de CaixaBank e Rural Talent, e o apoio en financiamento para a posta en marcha dos seus proxectos.