Lourenzá celebra a VI Feira do Cabalo cunha xornada dedicada á tradición ecuestre
recinto feiral de Lourenzá acolleu este domingo a sexta edición da Feira do Cabalo, unha cita dedicada ao mundo ecuestre que reuniu criadores, afeccionados e visitantes arredor das tradicións cabalares. As carreiras do Cabalo Marchador Galego foron un dos principais atractivos dunha xornada organizada polo Concello de Lourenzá en colaboración coa asociación Cabaleiros de Lourenzá.
A programación incluíu actividades relacionadas coa compravenda de gando, probas de andadura nas modalidades serrada e chapeada e concursos morfofuncionais de poldros. A feira tamén contou con propostas dirixidas ao público infantil, como paseos gratuítos a cabalo, ademais dun servizo de restauración aberto ás persoas asistentes.
A iniciativa busca promover o cabalo autóctono e contribuír á conservación e difusión das razas equinas galegas. O traballo da asociación Cabaleiros de Lourenzá resulta fundamental para impulsar esta celebración, que foi incorporando novas actividades ao longo das súas edicións e que se consolidou como un punto de encontro para os afeccionados ao sector na comarca da Mariña.
Presenza do deputado provincial Daniel García
O deputado provincial Daniel García achegouse ao recinto feiral para asistir á celebración e coñecer de primeira man o desenvolvemento dunha cita que combina tradición, actividade gandeira e promoción do mundo ecuestre.
A feira volveu converter Lourenzá nun punto de encontro para criadores, xinetes e público interesado nos cabalos, cun programa que puxo o foco nas probas ecuestres e na posta en valor do patrimonio cabalar galego.