José Carlos Paleo, ACIA Foz: “Os eventos en toda a comarca sempre teñen tirón comercial”
![Jose Carlos Paleo acia foz presidente](https://amarinaxa.com/wp-content/uploads/2021/09/Jose-Carlos-Paleo-acia-foz-presidente.jpg)
Por Ana Somoza López.
José Carlos Paleo é o presidente da Asociación de Comerciantes, Industriais e Autónomos.
Acia Foz CCA cumpre 35 anos.
Si, son 35 anos con moita historia, con moitas vendas e con moitos eventos. Nestes 35 anos de traballo podemos dicir que non todas as tarefas e as épocas foron sinxelas pero si moi agradecidas. Nós levamos desde o 2010 presidíndoa malia que se creou en 1988.
Como se consegue manter durante tanto tempo?
Pois basicamente baséanse na continuidade e na colaboración de todos os grupos tanto deportivos como culturais, e de todos os eventos que se fan no concello así como e fundamental a axuda do Concello e a Xunta de Galicia.
Preparan algún acto polo aniversario?
Polo momento non estudamos facer ningún evento especial, pois non queremos solapar coa gran cantidade de actividades culturais e turísticas coas que conta o municipio nesta época. Nós estamos máis enfocados a darlle pulo ao comercio durante os meses máis baixos.
Seguen sendo os mesmos principios e obxectivos que fai 35 anos?
Si, o primordial é a de impulsar a actividade empresarial, especialmente a dedicada ao pequeno comercio, e que sexa atractivo para os posibles compradores.
Como era ao principio?
Na primeira etapa fíxose moita forza na promoción turística de Foz tanto na zona do Bierzo como en Asturias e había tamén moita presenza nas feiras de mostras. Tamén se editaron guías turísticas e libros onde se amosaba toda a oferta local como o patrimonio cultural e turístico.
Pero os tempos avanzaron e vostedes con eles.
Por suposto. Os tempos van evolucionando e onde antes había que ir aos sitios a informarse sobre produtos e ofertas, hoxe é tan sinxelo como facer un click desde o móbil ou o ordenador e ese traballo axilizou moito a maneira de mercar. Pero hai que dicir que a parte presencial segue a ser fundamental e moi importante, e non se pode perder.
Entón teñen presencia nas redes e internet?
Si, contamos coa web e redes sociais pois son reclamos ou mostras dos espazos das tendas e locais comerciais focegos e dos seus produtos. Ademais dende ACIA Foz CCA ofrecemos a tarxeta de fidelización do comercio que serve para acumular puntos e descontos nas futuras compras. Hai que adaptase aos tempos que corren, e nos tentamos promocionar os produtos de cada un dos nosos membros da mellor maneira posible.
Que campañas hai de cara ao verán?
Teremos o noso tradicional Comercio na Rúa que será os días 20, 21 e 22 de xullo. E polo momento non temos formalizadas máis. O que facemos durante todo o ano é crear un círculo comercial que repercuta constantemente no pobo. Tamén, o 13 de xullo, contaremos coa de Mercar no teu comercio ten premio, na que se repartirán 1.000 euros en tarxetas prepago de 50 e de 300 euros para seguir mercando no comercio da vila. Todos os clientes que realicen compras entre o 6 e o 13 de xullo, poden participar no sorteo en directo que será o 13 ás 19.00 horas.
Esta época é moi boa para o comercio focego?
Claro. Durante o verán o turismo móvese moito polo que temos visitantes na vila todos os días. Xa non so polas nosas propias festas, senón polo turismo que move toda a comarca. Os eventos sempre teñen tirón comercial e moitas veces úsase a vila de base e logo móvense a visitar outro municipio e viceversa.
Foz e toda a Mariña xa son un punto de referencia no turismo estatal nesta época.
Si, porque a xente non só busca o sol, senón que ademais do clima haxa boa gastronomía, eventos, cultura, etc. A xente adoita afastarse dos 40º grados do Mediterráneo e aquí atopa bo tempo e boa comida. Na Mariña temos moitas cousas que merecen a pena e que veña xente e merque, benefícianos a todos.
Ten vantaxes mercar nesta vila mariñeira?
Por suposto que si. Como dicía antes contamos coa tarxeta de fidelización e informamos das ofertas e produtos nas tendas.
![CCAFOZ_2023_35ANIVersario](https://amarinaxa.com/wp-content/uploads/thumbs/2023/07/CCAFOZ_2023_35ANIVersario-200x104.jpg)
![cartel_foz_V5](https://amarinaxa.com/wp-content/uploads/thumbs/2023/07/cartel_foz-2023-merca-no-teu-comercio-scaled-200x282.jpg)
![Comercio na rua Foz 2023](https://amarinaxa.com/wp-content/uploads/thumbs/2023/07/Comercio-na-rua-Foz-2023-200x303.jpg)