Cultura | Sociedade

'O diario do sangue', de Óscar Martínez Rey, foi escollida como finalista na oitava edición do certame convocado polo Concello de Viveiro

A novela 'Mario non existe', de Francisco Fernández Dávila, fíxose co oitavo Premio de Novela Vilar Ponte, convocado polo Concello de Viveiro. O xurado acordou por unanimidade concederlle o galardón, mentres que a obra 'O diario do sangue', de Óscar Martínez Rey, foi seleccionada como finalista.

O tribunal valorou da proposta gañadora a súa capacidade para levar o lector a escenarios afastados, tanto desde o punto de vista xeográfico como cultural. A historia traslada o protagonista desde Galicia ata Nepal nun percorrido que vai máis alá da viaxe física e que ten unha dimensión espiritual, ata provocar unha transformación profunda na súa maneira de entender o mundo e na súa propia identidade.

O xurado tamén destacou a riqueza simbólica da narración e a súa capacidade para abordar cuestións como o destino, o azar e a memoria. A obra, segundo a valoración dos seus integrantes, afonda igualmente nas relacións familiares, na amizade verdadeira, na exploración do descoñecido e no poder que poden ter tanto as palabras como os silencios.

Pola súa banda, 'O diario do sangue', de Óscar Martínez Rey, foi recoñecida como finalista pola súa trama de intriga e investigación policial, a través da cal constrúe un retrato da sociedade actual. O xurado salientou que a novela se achega ás súas contradicións e zonas máis escuras, abordando a violencia estrutural, a marxinación e as consecuencias que sofren quen non se axusta ás convencións sociais.

A fluidez da escrita e a axilidade dos diálogos foron outros dos aspectos destacados desta obra, que propón unha historia trepidante na que os acontecementos dan xiros constantes e nada resulta ser necesariamente o que parece.

O xurado desta oitava edición estivo integrado por Carlos Nuevo Cal, cronista oficial de Viveiro, profesor e historiador; Rosalía Morlán Vieites, escritora e enfermeira; e Armando Requeixo Cuba, investigador, profesor e crítico literario. M. Rosario San Isidro Franco, traballadora municipal, exerceu como secretaria, con voz pero sen voto, e encargouse de levantar acta da sesión.

A alcaldesa de Viveiro, Mariña Gueimunde, felicitou as persoas premiadas e agradeceu o traballo do tribunal, así como a participación de todos os autores e autoras que concorreron ao certame. A rexedora puxo en valor a importancia do premio como compromiso coa cultura e coa lingua galega e como ferramenta para situar Viveiro como referente da literatura contemporánea e atraer escritores de todo o país.