Foz reúne as confrarías do Cantábrico-Noroeste para analizar os retos da pesca artesanal
A Federación Provincial de Confrarías de Pescadores de Lugo organiza esta semana en Foz unha nova edición da Interfederativa de Confrarías de Pescadores do Cantábrico-Noroeste, un encontro no que representantes dos pósitos de Galicia, Cantabria e Euskadi poñerán en común cuestións de interese para o sector pesqueiro.
O congreso desenvolverase este xoves 8 e venres 9 de outubro no Playa de Foz Hotel & Spa e permitirá analizar a situación actual das flotas artesanais e abordar os principais desafíos aos que se enfrontan de cara ao futuro.
A programación comezará na tarde do xoves cunha Xornada Técnica na que os representantes das federacións revisarán as conclusións da última Interfederativa, celebrada hai un ano en Viveiro. Ademais, neste encontro poñeranse sobre a mesa as principais preocupacións que afectan actualmente ao sector.
A segunda xornada terá lugar o venres pola mañá e consistirá nunha sesión de traballo conxunta entre representantes das confrarías e das Administracións pesqueiras de España e das comunidades autónomas do Cantábrico. Durante esta reunión, o sector trasladará ás administracións as principais conclusións extraídas dos debates desenvolvidos o día anterior.
A partir das 12.30 horas terá lugar o acto de clausura, que estará presidido pola conselleira do Mar da Xunta de Galicia, Marta Villaverde, e pola secretaria xeral de Pesca do Ministerio de Agricultura, Pesca e Alimentación, Isabel Artime.
Na clausura tamén participarán representantes de entidades políticas, pesqueiras e económicas do ámbito local. O acto estará, ademais, aberto aos medios de comunicación.