Foz reforza a biblioteca municipal e RadioFoz con novos investimentos e melloras
O Concello de Foz continúa avanzando na mellora dos seus servizos culturais cunha nova fase de investimentos centrada na biblioteca municipal Salgado Toimil e nas instalacións de RadioFoz, situadas na Casa da Cultura Poeta Manuel María.
Nos últimos meses, o goberno local impulsou diferentes actuacións destinadas a modernizar estes espazos e adaptalos ás necesidades actuais da veciñanza. Entre elas, destaca a posta en funcionamento, a finais de 2024, dunha nova sala de estudo na biblioteca municipal, unha infraestrutura moi demandada polo estudantado do municipio.
A concelleira de Cultura, Inés López Couto, explicou que esta actuación supuxo un investimento superior aos 12.000 euros, permitindo transformar a antiga sala de exposicións nun espazo acondicionado para o estudo, cun ambiente semellante ao dunha biblioteca universitaria. Segundo sinalou, o horario ininterrompido de apertura, de luns a venres entre as 8:30 e as 20:00 horas, converteu este lugar nun punto de referencia para estudantes e opositores.
A responsable municipal destacou que as necesidades da Casa da Cultura continúan evolucionando, polo que o Concello decidiu destinar máis de 31.000 euros adicionais á renovación do equipamento tanto da biblioteca como da radio municipal, para o que tamén se solicitou colaboración á Xunta de Galicia.
No ámbito da biblioteca, os traballos inclúen a actualización dos fondos bibliográficos, cun investimento anual próximo aos 10.000 euros, así como a organización de actividades de dinamización da lectura, especialmente dirixidas ao público infantil e aos centros educativos. Neste sentido, o espazo foi gañando protagonismo como lugar de encontro, onde as familias comparten tempo de lectura e os usuarios poden desenvolver traballos en grupo.
Pola súa banda, o alcalde de Foz, Fran Cajoto, puxo en valor o conxunto de melloras realizadas na Casa da Cultura nos últimos anos, subliñando a boa acollida que están a ter entre a cidadanía. Así, lembrou que en maio de 2023 se estreou a nova páxina web municipal e se abriu RadioFoz á emisión en liña, permitindo escoitar a radio pública desde calquera parte do mundo.
Ademais, en novembro de 2024 inaugurouse a sala de estudo do primeiro andar, mentres que recentemente se acometeron actuacións como a renovación da iluminación, a pintura dos espazos e a mellora do mobiliario da biblioteca, tanto para adultos como para o público máis novo.
No que respecta á radio municipal, Cajoto destacou a modernización integral dos seus equipos, coa incorporación de novos procesadores, sistemas para a xestión de chamadas telefónicas e ferramentas informáticas que permiten dixitalizar os procesos de emisión. Tamén se incorporou un equipo portátil que posibilita a realización de retransmisións en directo desde distintos puntos do concello, mellorando a calidade das emisións.
O alcalde avanzou que o Concello continuará traballando na mellora das instalacións culturais, con proxectos que inclúen a renovación do salón de actos, a pintura exterior do edificio e unha futura ampliación dos horarios, co obxectivo de consolidar a Casa da Cultura como un espazo dinámico e activo para a vida cultural de Foz.