Foz inicia os trámites para solicitar a declaración de Festa de Interese Turístico de Galicia para o Carme
O Concello de Foz deu os primeiros pasos para impulsar a declaración das festas do Carme como Festa de Interese Turístico de Galicia, unha iniciativa coa que o goberno local pretende recoñecer o valor cultural, social e tradicional dunha das celebracións máis emblemáticas da vila.
A concelleira de Cultura, Inés López Couto, explicou que esta festividade representa unha das expresións máis sentidas da identidade focense e da vinculación histórica da localidade co mar. Segundo indicou, o día grande das celebracións, o 16 de xullo, converte cada ano as rúas de Foz nun escenario de emoción, tradición e participación veciñal.
Desde o Concello consideran que a festa reúne as condicións necesarias para obter este distintivo autonómico debido á súa longa traxectoria, ao forte arraigo popular e á singularidade dalgúns dos seus actos máis representativos. Entre eles destaca a procesión da Virxe do Carme, unha imaxe de grandes dimensións que percorre a vila a ombros dos portadores nun extenso itinerario polas rúas do municipio.
Outro dos elementos que o executivo local pon especialmente en valor é a tradición das alfombras florais, elaboradas cada ano coa implicación directa da veciñanza e de numerosos colaboradores. Esta manifestación artística e popular converte as rúas en auténticos tapices efémeros e atrae a milleiros de visitantes que participan activamente na celebración.
O alcalde de Foz, Fran Cajoto, sinalou que esta iniciativa tamén pretende servir de recoñecemento ao traballo desenvolvido durante décadas por colectivos, comisións e persoas voluntarias que mantiveron viva esta tradición. Neste sentido, destacou o labor da Cofradía Mar de Foz, dos alfombristas e de todas aquelas persoas que contribúen á organización dos festexos.
Pola súa banda, o concelleiro de Alumeado Público, Ángel Fernández Neira, avanzou que o Concello quere reforzar tamén a homenaxe á tradición mariñeira da vila a través de novas iniciativas simbólicas. Entre elas mencionou a inauguración do mural do edificio de Telefónica e a iluminación das letras de Foz coas cores da bandeira local.
Desde o goberno municipal mostran confianza en que o proceso avance favorablemente nos próximos meses e consideran que esta declaración serviría para dar maior proxección a unha das celebracións máis representativas da comarca mariñá.
