Foz impulsa o XXI Concurso de Postais de Nadal e reforza a programación cultural de fin de semana
A Biblioteca Municipal Salgado Toimil, de Foz, vén de activar unha nova edición do seu clásico concurso artístico de inverno. Trátase do XXI Concurso de Postais de Nadal, aberto a todo o alumnado do concello e organizado co propósito de promover a creatividade, a participación e o uso do galego entre as novas xeracións.
A concelleira de Cultura, Inés López Couto, explicou que o prazo estará aberto ata o 12 de decembro e salientou que “as postais deberán facerse en cartolina duns 16 x 11 centímetros, con técnica totalmente libre e empregando sempre texto en galego”. A responsable cultural precisou que se establecen as categorías de Infantil, Primaria A (1º, 2º e 3º), Primaria B (4º, 5º e 6º) e ESO, cun total de tres premios en cada grupo.
López Couto destacou ademais que “a postal gañadora converterase na felicitación oficial do Concello de Foz para o Nadal 2025, un recoñecemento que sempre fai moita ilusión ao alumnado participante”.
Xunto ao certame, a biblioteca tamén se suma ás accións de sensibilización con motivo do 25N, Día Internacional da Eliminación da Violencia contra a Muller. Tal como indicou a concelleira, ata o 28 de novembro permanecerá dispoñible unha mostra bibliográfica con obras literarias e divulgativas que abordan a igualdade, a perspectiva de xénero e diversas formas de violencia machista. O obxectivo, afirmou, é “promover a lectura como ferramenta transformadora e de concienciación social”.
A programación cultural da fin de semana en Foz chegará cargada de propostas. O venres 21, ás 20:30 horas, a Sala Bahía acollerá a representación teatral Yo solo quiero irme a Francia, protagonizada por María Galiana —coñecida por dar vida a Dona Herminia en Cuéntame— xunto con Nieve de Medina, Ledicia Sola e Alicia Armenteros. A entrada terá un prezo de 5 euros.
O sábado será a quenda da música, coincidindo coa celebración da Santa Cilla. A Banda de Música de Foz ofrecerá un concerto ás 20:00 horas na Sala Bahía, mentres que na parroquia de Santa Cilla haberá festa tanto o sábado como o domingo, con actuacións e actividades abertas á veciñanza.
A concelleira de Cultura concluíu destacando que “é unha fin de semana moi completa, cunha programación que combina tradición, teatro, música e participación. Agardamos que a veciñanza se anime a gozar de todas estas propostas”.