Foz iluminará a Casa Consistorial de verde polo Día Mundial da ELA
Foz iluminará de cor verde a fachada da Casa do Concello con motivo do Día Mundial da Esclerose Lateral Amiotrófica (ELA), que se conmemora este domingo, día 21 de xuño, incorporándose así á campaña de concienciación e apoio ás persoas que conviven con esta enfermidade neurodexenerativa e ás súas familias.
A concelleira de Sanidade en Foz, Kathy Navarro Machado, sinala que a ELA é unha patoloxía do sistema nervioso que afecta ás neuronas motoras, o que provoca unha perda progresiva da capacidade muscular. Co avance da enfermidade, as persoas afectadas poden ver comprometidas funcións esenciais como camiñar, falar, alimentarse ou respirar, mentres que na maioría dos casos se manteñen intactas as capacidades cognitivas. En España estímase que arredor de 4.000 persoas conviven actualmente con esta doenza e cada ano rexístranse novos diagnósticos.
A investigación científica e o acceso a recursos asistenciais son fundamentais para mellorar a calidade de vida e avanzar en novos tratamentos. Con este xesto simbólico, o Concello de Foz quere reafirmar o seu compromiso coa sensibilización social, a visibilización da ELA e o apoio ás persoas afectadas e ás súas familias, contribuíndo a dar maior relevancia a unha realidade que precisa máis coñecemento e recursos.
Así mesmo, Navarro subliña a importancia de que as institucións locais apoien iniciativas que axudan a dar visibilidade a enfermidades como a ELA, que teñen un forte impacto nas persoas que a padecen e no seu contorno familiar. Con esta iluminación, apunta, preténdese transmitir unha mensaxe de apoio, empatía e compromiso tanto coa sensibilización como coa investigación.
O Concello de Foz reafirma deste xeito a súa aposta pola promoción da saúde e pola participación en accións de concienciación que contribúan a construír unha sociedade máis informada, sensible e comprometida coas persoas afectadas por distintas doenzas.