Foz entrega os diplomas de dous cursos de formación laboral para mulleres inmigrantes
O Concello de Foz entregou os diplomas correspondentes a dous cursos de formación dirixidos prioritariamente a mulleres inmigrantes residentes no municipio. A iniciativa, integrada no programa Emprega, permitiu ás participantes especializarse nos ámbitos de camareira de pisos e caixeira/repoñedora, dous perfís con demanda no tecido laboral de Foz e da comarca.
No acto participaron a concelleira de Inmigración de Foz, Ana Rojo, e representantes da entidade Bumei Galicia, responsable do desenvolvemento da formación. O proxecto conta coa colaboración da Asociación Bumei Mulleres Emprego e Inclusión e co apoio económico da Consellería de Política Social e Igualdade da Xunta de Galicia, no marco dunha liña de axudas cofinanciada polo Fondo Social Europeo.
Ana Rojo explicou que os cursos se desenvolveron ao longo dos últimos meses coa finalidade de ofrecer ás participantes ferramentas que lles permitan mellorar as súas posibilidades de acceso ao mercado laboral e avanzar na súa autonomía socioeconómica.
As alumnas recibiron formación como camareiras de pisos, orientada principalmente ao sector hoteleiro e hostaleiro, e como caixeiras/repoñedoras, con aplicación no ámbito do comercio, os supermercados e os establecementos locais. Segundo destacou a concelleira, trátase de dous perfís profesionais que presentan unha demanda significativa no mercado laboral do municipio e da comarca.
A responsable municipal puxo tamén o foco no esforzo realizado polas participantes durante o proceso formativo. En varios casos, sinalou, tiveron que compatibilizar as horas de formación coas súas responsabilidades familiares e con empregos a tempo parcial.
O programa implicou ademais un traballo previo de valoración e acompañamento das mulleres participantes. A educadora municipal realizou entrevistas individuais para coñecer a situación sociolaboral de cada unha delas e elaborar posteriormente os correspondentes informes, que permitiron a súa derivación á entidade Bumei.
A partir dese momento, as profesionais da asociación encargáronse de impartir os contidos formativos, realizar a titorización e ofrecer un acompañamento integral ás alumnas ao longo de todo o itinerario. Deste xeito, a iniciativa combinou a intervención dos servizos municipais de Benestar e Inmigración coa experiencia da entidade especializada na formación e inclusión laboral.
Ana Rojo destacou que esta colaboración entre o Concello de Foz, Bumei Galicia e a Xunta de Galicia permite desenvolver actuacións específicas para favorecer a incorporación das mulleres inmigrantes ao mercado de traballo e facilitar o seu proceso de integración.
A concelleira de Inmigración asegurou finalmente que o Concello de Foz continuará impulsando iniciativas destinadas á inserción laboral e á igualdade de oportunidades, coa intención de avanzar cara a unha integración efectiva das persoas inmigrantes no municipio.