Foz elixirá este sábado a raíña ou rei do Entroido 2027
Foz celebrará este sábado, 24 de outubro, a elección da raíña ou rei do Entroido 2027. A cita será na Sala Bahía a partir das 20.00 horas e servirá para escoller a persoa que representará unha das festas máis destacadas da Mariña nos vindeiros meses.
A programación comezará cun monólogo de Marcos Pereiro, coñecido polo seu personaxe de Nucha, das pandeireiteiras de Ardebullo, así como pola súa traxectoria noutros ámbitos da cultura galega. A continuación, as persoas candidatas presentarán as súas propostas e explicarán os motivos polos que aspiran a converterse na máxima representación do Entroido focense.
Unha vez rematadas as intervencións, o público poderá coñecer o resultado da votación, que determinará quen asumirá o título de raíña ou rei do Entroido 2027. A xornada completarase coa música da orquestra Dinastía e unha sesión con DJ.
A concelleira de Cultura, Inés López Couto, anima a veciñanza a participar nesta celebración, que permitirá escoller a figura encargada de representar o Entroido de Foz durante os próximos meses.