As oficinas de turismo de Foz e o Centro de Interpretación da Basílica de San Martiño atenderon este verán a mil persoas máis que no mesmo período do ano anterior. Segundo a concelleira de Turismo, Kathy Navarro, este aumento reflicte a tendencia positiva que o concello vén experimentando nos últimos anos, coa chegada de turistas atraídos polas súas praias, patrimonio histórico e oferta cultural.
Navarro destacou que o 87 % dos visitantes son de procedencia nacional, sendo Madrid a principal orixe, seguida de Galicia e Asturias. No ámbito internacional, Francia lidera o turismo estranxeiro, representando o 45 % dos turistas que visitan Foz. Outros países como Inglaterra, Italia e Portugal tamén tiveron presenza, cunha media do 12 % cada un. Ademais, a ocupación dos aloxamentos turísticos durante o verán roldou o 100 %, co incremento de visitantes do sur de España grazas ás temperaturas máis suaves da zona.
O alcalde de Foz, Fran Cajoto, valorou moi positivamente o impacto económico do turismo no concello e fixo fincapé na necesidade de mellorar a sustentabilidade. "Estamos a medrar ano a ano, pero precisamos máis recursos para atender a crecente demanda", sinalou o rexedor. Cajoto reclamou a implantación dunha taxa turística que permitiría ao concello mellorar os servizos sen sobrecargar a veciñanza.
O alcalde tamén resaltou o incremento do número de empadroados en Foz, un indicador positivo que reflicte o dinamismo do concello. Ademais, mencionou a reactivación de promocións inmobiliarias e novos proxectos de vivenda, mentres apelaba a unha reflexión sobre a regulación da vivenda turística para compatibilizar o turismo cun mercado de alugueiro máis accesible. Por último, Cajoto quixo agradecer o traballo do persoal municipal durante o verán, destacando o esforzo realizado polos operarios e o servizo de salvamento, que garantiu un verán sen incidencias graves nas praias
