Sociedade

A programación inclúe unha comida popular o sábado, con callos e costela asada, seguida dunha verbena co Trío Sueños e DJ Cosme, mentres que o domingo haberá misa, procesión e sesión vermú

A parroquia de Santa Cilla, en Foz, celebrará as súas festas patronais os días 21 e 22 de novembro cunha programación que combinará gastronomía, música e tradición. A Comisión de Festas preparou dúas xornadas de actividades nas que non faltarán a comida popular, as actuacións musicais e os actos relixiosos.

A celebración comezará o sábado 21 cunha sesión vermú amenizada polo Trío Sueños. A partir das 15.00 horas terá lugar unha comida popular cun menú composto por callos, costela asada, pan, viño, auga, sobremesa, café e chupito. O prezo será de 25 euros por persoa, mentres que os nenos e nenas de ata 12 anos pagarán 12 euros.

As reservas poderán realizarse ata o xoves 19 de novembro nos teléfonos 670 509 169, de Pepe, e 622 410 490, de Pacucho.

A actividade continuará a partir das 18.30 horas cun baile no que volverá actuar o Trío Sueños, acompañado nesta ocasión por DJ Cosme, nunha proposta musical que se prolongará durante a noite.

O domingo 22 estará dedicado aos actos relixiosos e á música. A partir das 13.00 horas celebrarase a misa solemne, seguida da procesión e dunha sesión vermú que correrá a cargo do Dúo Son do Val.

A organización anuncia que o recinto estará cuberto cunha carpa e contará con calefacción para ofrecer maior comodidade aos asistentes durante as dúas xornadas.

As festas están organizadas pola Comisión de Festas de Santa Cilla, coa colaboración do Concello de Foz.