Foz aproba un orzamento de máis de 10,2 millóns centrado en servizos, rural e melloras da auga
O Concello de Foz deu luz verde ao orzamento municipal deste ano, que ascende a 10.208.784,14 euros e que, segundo o Goberno local, está orientado a reforzar os servizos públicos e a mellorar distintas áreas clave do municipio. As partidas económicas céntranse especialmente no ámbito social, cultural, deportivo e educativo, ademais de incluír actuacións en infraestruturas e equipamento municipal.
Entre os investimentos previstos destacan as actuacións en vías rurais, a compra dunha nova varredora e dunha cesta para traballos en altura, maquinaria considerada necesaria para o mantemento dos servizos básicos. Tamén se recolle unha nova aposta pola mellora da Escola de Música, coa adquisición de material, así como un incremento das subvencións dirixidas a clubs deportivos, asociacións culturais, entidades sociais e colectivos de protección animal.
A concelleira de Facenda, Inés López Couto, sinalou que o orzamento busca adaptarse ás necesidades reais do municipio, aínda que recoñeceu que os recursos son limitados e obrigan a priorizar. Neste sentido, explicou que o equipo de goberno continúa a traballar para captar fondos doutras administracións co obxectivo de ampliar os investimentos.
López Couto destacou tamén a incorporación de medidas no ámbito social, como o aumento do programa Xantar na Casa e a creación dunha segunda praza de traballador social. Ademais, incluíronse subvencións nominativas para as ANPAs dos centros educativos destinadas a cubrir os custos do servizo de madrugadores, no que o Concello xa viña colaborando.
No ámbito rural, o orzamento prevé un impulso ás obras nas parroquias, que concentrarán unha parte importante dos investimentos deste exercicio, combinando fondos propios e achegas doutras administracións. No apartado de auga, recóllense actuacións de mellora da rede, incluíndo a substitución dunha tubaxe xeral debido ás frecuentes avarías, así como intervencións na potabilizadora de Fazouro e na traída de Cordido. Segundo o executivo local, estas actuacións non suporán incremento no prezo do servizo ao financiarse a través do novo contrato.
A edil de Facenda tamén respondeu ás críticas da oposición sobre o canon inicial da concesión do servizo de abastecemento de auga, defendendo que o sistema de ingreso concentrado no inicio do contrato xa figuraba en pregos anteriores. Neste sentido, o goberno local asegurou que o orzamento se elaborou con previsións prudentes e criterios de garantía, ao tempo que se traballa na mellora da recadación para evitar que a falta de pagamento repercuta no conxunto da veciñanza.
López Couto agradeceu ademais a implicación do servizo de Intervención, destacando a axilidade coa que se puido pechar o documento orzamentario, reducindo os prazos de tramitación ao mínimo.
Pola súa parte, o alcalde de Foz, Francisco Cajoto, puxo en valor que esta semana estivo marcada polos acordos, tanto no relativo á mellora do campo de fútbol de Malates como na aprobación do orzamento. Subliñou que o obxectivo do equipo de goberno é garantir a xestión e evitar a parálise institucional, apostando polo diálogo e pola colaboración entre formacións políticas.
Cajoto afirmou que a clave para o futuro do municipio pasa polos consensos e pola estabilidade, afastándose da confrontación política. Engadiu que Foz continúa nunha liña de crecemento e mellora, e que os indicadores actuais son positivos, polo que o executivo local seguirá traballando para consolidar esa tendencia.