Foz abre o prazo de preinscrición para o programa estival Aberto x Vacacións
O Concello de Foz vén de abrir o prazo de preinscrición para unha nova edición do programa Aberto x Vacacións, unha iniciativa dirixida á infancia que se desenvolverá ao longo dos meses de xullo e agosto con propostas lúdicas e educativas.
O concelleiro de Xuventude, Ángel Fernández Neira, explicou que o obxectivo é ofrecer un verán dinámico para nenos e nenas nacidos entre os anos 2014 e 2022, con actividades repartidas por distintos espazos do municipio. O campamento base situarase no CEIP O Cantel, cun horario habitual de 10:30 a 13:30 horas.
Para dar resposta ás necesidades de conciliación das familias, o programa inclúe tamén a opción “Érguete”, que permite adiantar o inicio da xornada ás 09:00 horas. Deste xeito, o Concello busca facilitar a organización diaria durante o período estival, combinando tempo de lecer con propostas formativas.
A preinscrición pode realizarse a través da sede electrónica municipal ou mediante a presentación da documentación no rexistro do Concello. Toda a información está dispoñible na web oficial.
Pola súa banda, o alcalde, Fran Cajoto, avanzou que a programación incluirá novas actividades, entre elas o campamento Camp Night na Obra Pía de Fazouro, unha proposta que xa tivo boa acollida o pasado ano e que reforza a oferta de lecer educativo no municipio.