Forxán quenta motores para a IV Festa do Mexillón cunha xornada de sabor e diversión
A parroquia de Forxán volverá converterse nun punto de encontro para veciñanza e visitantes coa celebración da IV Festa do Mexillón, unha proposta que combina gastronomía, lecer e actividades para toda a familia. A cita terá lugar o vindeiro 1 de agosto na área recreativa do Bispo Santo, en Foz, cun programa pensado para desfrutar dunha completa xornada festiva ao aire libre.
A programación arrancará ás 14:00 horas coa apertura da festa e o servizo do menú popular, no que o mexillón volverá ser o gran protagonista. A iniciativa busca reunir a persoas de todas as idades arredor da mesa, poñendo en valor un dos produtos máis representativos da costa galega.
A partir das 17:00 horas, o Mago Paco ofrecerá o espectáculo Delicias, unha actuación dirixida a públicos de todas as idades que combinará ilusión, humor e participación.
Ao longo de toda a xornada, os máis pequenos poderán gozar gratuitamente de inchables e colchonetas instaladas no recinto, ampliando así a oferta de actividades para as familias.
A celebración completarase coa actuación do grupo Pekados, que será o encargado de poñer a nota musical á sobremesa e de prolongar o ambiente festivo durante a tarde.
A organización anima á veciñanza e ás persoas que visiten Foz nesas datas a participar nesta cuarta edición da Festa do Mexillón, unha cita que continúa consolidándose dentro da programación estival do municipio como unha proposta que une boa gastronomía, convivencia e entretemento.