Deportes

O evento solidario destaca polo seu compromiso social, xa que parte dos fondos recadados destinaranse a proxectos locais

O Concello de Barreiros organiza a súa tradicional Andaina e a Carreira Popular Solidaria de Reis, que se celebrarán este domingo, 12 de xaneiro, nas inmediacións do Centro Sociocultural de San Cosme.

A xornada arrancará ás 10.00 horas coa entrega de dorsais a todos os participantes. Ás 11.00 horas terá lugar a saída da andaina solidaria, cun percorrido de 9 quilómetros e unha dificultade media-baixa, ideal para persoas de todas as idades e niveis de preparación física.

A continuación, ás 11.10 horas, será o momento das probas infantís, organizadas por categorías adaptadas ás diferentes idades, co obxectivo de fomentar a participación dos máis pequenos e introducilos ao mundo deportivo dun xeito lúdico e divertido.

Finalmente, ás 12.00 horas, comezará a carreira absoluta, na que os participantes deberán completar un percorrido de 8 quilómetros. Este evento está pensado tanto para corredores experimentados como para afeccionados que queiran gozar dunha mañá de deporte en compañía.

O concelleiro de Dinamización e Participación Veciñal, Dani García, subliña o carácter especial desta xornada "este día é moito máis que unha competición deportiva. O noso obxectivo é promover hábitos de vida saudables, apoiar causas sociais e crear un espazo onde a comunidade poida reunirse e convivir. Animamos a toda a veciñanza a participar e desfrutar dunha xornada que combina deporte, solidariedade e diversión”.

O evento solidario destaca polo seu compromiso social, xa que parte dos fondos recadados destinaranse a proxectos locais de apoio social, reforzando así o papel do deporte como ferramenta para o benestar colectivo.

Desde o Concello de Barreiros, convidan a todas as persoas interesadas a unirse a esta iniciativa e a formar parte dunha experiencia enriquecedora que une deporte, solidariedade e comunidade.