Fernando Fernández e Eugenio Alonso, CD San Ciprián: “Foi un gran logro gañar todos os partidos da tempada“
![Cervo tenis de mesa CD San Ciprian ascenso terceira nacional](https://amarinaxa.com/wp-content/uploads/2022/05/Cervo-tenis-de-mesa-CD-San-Ciprian-ascenso-terceira-nacional.jpg)
Por Ana Somoza López.
Fernando Fernández e Eugenio Alonso, do CD San Ciprián de tenis de mesa.
O CD San Ciprián contan cunha sección de tenis de mesa que recentemente ascendeu a Terceira Nacional. Falamos con Fernando Fernández, directivo do CD San Ciprián, e con Eugenio Alonso, adestrador e xogador.
Como comezou o club e a sección de tenis de mesa?
F.F.: O club foi fundado no ano 1982 e nun principio contaba con varias seccións nas que destacaban as de balonmán e baloncesto tanto de rapaces como de rapazas. Naqueles tempos non había sección de fútbol pois non existía o campo pero co paso dos anos foron creándose máis seccións.
A sección de tenis de mesa do CD San Ciprián comezou a participar en torneos no ano 1993, logo dun longo parón, retomouse a competición no ano 2018 aproveitando que había xogadores nos concellos de Burela e Viveiro e xunto cos nosos, puidemos volver a formar o club chegando a acadar ese ascenso a Terceira Nacional nesta tempada.
Cantos xogadores ten o club?
F.F.: Pois o equipo sénior está formado por 8 xogadores e agora estamos comezando a adestrar a nenos de 6 a 12 anos e serán sobre uns 13 ou 14 nenos. Estes cativos aínda non competiron, farano o ano que ven.
Entón están a formar canteira?
F.F.: Si. O que intentamos e formalos e adestralos para que a sección de tenis de mesa non desapareza outra vez. Se ao final non hai nenos que xoguen non hai relevo xeracional. O que pasa que o tenis de mesa é un deporte co que desfrutan e o pasan moi ben cando son pequenos e ademais custa moito aprender porque non hai categorías para competir xa que é por divisións.
Entón o tenis de mesa non conta con categorías?
F.F.: No tenis de mesa federado xógase por clubs pero para os cativos existe o programa Xogade no que si que se xoga por categorías.
Cales son os obxectivos do club?
F.F.: No tocante aos nenos os nosos obxectivos son os de inculcarlles valores no deporte así como comezar a competir o vindeiro ano no programa Xogade. Eu creo que polo menos con cinco ou seis nenos poderemos arrincar na vindeira tempada 2023. O tenis de mesa require moita práctica pois son moitos movementos repetitivos, non podes xogar un partido se non sabes sacar nin pasar a bóla. Hai certos golpes que son fundamentais neste deporte para ter un mínimo nivel.
A Mariña conta con máis clubs na categoría de Terceira Nacional?
F.F.: Na comarca tan só estamos o Ribadeo, que se mantivo polos pelos na categoría, e nós. Despois nas outras comarcas están Vilalba, Dez Portas e Milagrosa, que este último xogou este ano o play off de ascenso a Superliga.
Que particularidades ten este deporte?
F.F.: As bólas pesan moi pouco e practicamente hai que rozalas para golpealas e que collan efecto. Hai xogadores que xogan con diferentes pas, diferentes gomas para que amortecen máis ou que teñen picos para darlle efecto á pelota.
Recentemente ascenderon a Terceira Nacional, como se vive ese momento?
E.A.: Pois estamos moi contentos a verdade. O noso obxectivo durante toda a tempada era ascender, e a falta de tres xornadas xa eramos campións de liga. Foi un gran logro porque gañamos os 18 partidos da tempada.
Como será a competición a partir de agora?
E.A.: Pois en principio xogaremos no grupo Norte con equipos de Ferrol, Narón, Zas, etc. Pero cada ano cambian un pouco a división dos tres grupos Norte, Centro e Sur, así que cando comece a tempada veremos.
Algún campionato ou algún partido en especial?
E.A.: Quizais o que máis lembro son os dous partidos que xogamos nesta tempada contra o Breogán Oleiros, que eran os nosos rivais directos. Foron partidos importantes e o último, no que xogabamos polo ascenso foi contra eles facendo un 4-0.
Como son os adestramentos?
E.A.: Pois adestramos 3 días á semana durante 1 hora e media cada día, e o primeiro que facemos é un pouco de quentamentos previo por parellas, un pouco de peloteo básico para comezar e despois algún exercicio máis específico e xa enfocado á mellora dos puntos fracos de cada xogador.
Ping pong ou tenis de mesa?
E.A.: O ping pong é o que se refire ao que antigamente se practicaba como un xogo de lecer, mentres que o tenis de mesa é o deporte en si. Pero unha cousa é pasar un rato xogando ao ping pong e outra moi diferente e xogar ao tenis de mesa onde xa tes que facer golpes e ter técnica.
Algún consello para os futuros xogadores?
E.A.: O noso consello é que se acheguen a probar o tenis de mesa pois é un deporte moi descoñecido. Tamén lles dicimos que somos un club moi familiar e que poden achegarse a ver e desfrutar dalgún partido pois son gratuítos e xóganse, no noso caso, os domingos ás 11.00 horas.