Martín Fernández, surfista ribadense: "É un deporte moi esixente fisicamente e que permite un contacto coa natureza moi intenso"
Por Ana Somoza López.
Falamos con Martín Fernández, un rapaz ribadense que dende moi novo dedicouse a aquilo que lle apaixoaba, o surf
Como comezou a súa aventura?
Cando tiña 6 anos comecei nas escolas municipais de surf que organizaba o Concello de Ribadeo durante o verán. E agora xa teño 16 así que xa levo uns cantos nas miñas costas.
Compite individualmente o nun equipo?
O surf é un deporte individual aínda que formo parte do grupo de adestramento Picante Surf de Tapia de Casariego e son discípulo do tapiego Pedrín Méndez Obejero, que é o adestrador da escola Picante.
Canto tempo leva competindo?
Levo competindo desde os 8 anos, momento no que debutei no Circuíto Asturiano Júnior de Surf.
Conta con moitos títulos?
Martín foi campión asturiano na categoría Sub12, Campión galego na Sub14 durante dous anos consecutivos e actualmente é o Campión galego en categoría Sub16. Ademais participou en cinco Campionatos de España onde chegou a ser top 5 a nivel individual e Campión de España formando parte da Selección Galega.
Durante o 2021 foi cando fixo os seus mellores resultados desde que comezou a competir, enlazando cinco postos de finalista consecutivos e logrando quedar cuarto nas Júnior Series nacionais e debutando no Campionato Europeo onde logrou entrar no top 50.
Que destacaría do surf?
Que é un deporte moi esixente fisicamente e que che permite un contacto coa natureza moi intenso.
Cales son os seus referentes?
Hai grandes surfistas pero os meus favoritos son dous australianos, Noa Deane e Shaun Manners e o estadounidense Griffin Colapinto. Son tres surfeiros de moi alto nivel e cun surf envexable.
Pódese practicar este deporte en Ribadeo e en toda a Mariña?
En Ribadeo pódese practicar pero conta con poucos sitios xa que o que se precisan son unhas condicións de mar moi determinadas. Con todo na Mariña case sempre atopas un punto onde surfear sexan cales sexan as condicións de vento e mar.
Cál é o mellor e o peor deste deporte?
O mellor é os grandes amigos que fas e o ben que o pasas na súa compañía e o peor é o frío que se pasa durante o inverno, polo menos aquí no norte da península.
Algún campionato que lembre con agarimo ou que marcara un momento inesquecible?
A miña participación o ano pasado na proba do Campionato de Europa celebrada na localidade da Torche, na Bretaña Francesa. Acudín acompañado de dous grandes amigos, Samu e Iván e conseguimos un resultado bastante bo, medíndonos cos mellores júniors europeos.
Algunha anécdota que lle siga arrincando un sorriso?
O baño no que realicei o meu primeiro tubo na mítica onda La Graviere, nas Landas francesas. Aquel día o mar estaba en moi boas condicións para tentar esta manobra e cando por fin o logrei sentín que superara os meus límites.
Ribadeo conta co Panchorro e o Illa Pancha Challenge, que lle parece?
Respecto a isto síntome moi orgulloso de vivir nun Concello onde se celebra un evento de importancia internacional no surf de olas grandes. A verdade é que é unha pasada ver esas olas e ver aos surfistas nelas. Algún día gustaríame participar no Illa Pancha Challenge, estaría moi ben.