Dolores García Caramés encabezará a nova xunta xestora do PP de Cervo
O Partido Popular de Cervo constituíu a súa nova xunta xestora, que estará presidida pola alcaldesa, Dolores García Caramés, e na que estarán representados tanto os actuais integrantes do goberno municipal como antigos rexedores da formación, membros de Novas Xeracións e militantes de base. A reorganización pretende reforzar a estrutura local e preparar a agrupación para as próximas convocatorias electorais.
A constitución formal do órgano completouse este martes nunha reunión na que participou o secretario xeral do PP da provincia de Lugo, Javier Vázquez Nodal. O nomeamento de García Caramés como responsable da agrupación local xa fora acordado na última xuntanza da xunta directiva provincial.
A alcaldesa destacou a traxectoria do partido no municipio e o traballo realizado polas persoas que contribuíron ao seu desenvolvemento. "Este é un proxecto que non nace hoxe, senón que conta cunha historia, cunha traxectoria e co esforzo de moitas persoas que contribuíron a facelo medrar", sinalou. García Caramés comprometeuse a continuar traballando con "ilusión, responsabilidade e unidade" para dar continuidade á formación en Cervo.
Pola súa banda, o expresidente local e actual integrante da xestora Alfonso Villares considerou que este proceso permite afrontar a renovación organizativa priorizando o proxecto colectivo. Tamén manifestou a súa intención de seguir colaborando coa agrupación como un afiliado máis.
Javier Vázquez Nodal agradeceu o labor desenvolvido durante anos polos integrantes do PP local e destacou a implicación da nova dirección. Segundo indicou, esta renovación forma parte dos preto de 50 procesos de reorganización da estrutura provincial celebrados nos últimos cinco anos. Engadiu que a agrupación busca prepararse para as próximas citas electorais.
A nova xestora estará formada por Dolores García como presidenta e Alfredo Antonio Fernández como secretario e portavoz. Os vogais serán Pilar Armada, Adrián Arias, Manuela Méndez, José Manuel Balseiro, David Rodríguez, Alfonso Villares, José Ínsua, Toño Gallego, Alexis Villarquide, Inoa Pardo e Elisabet Peña.