Comeza a primeira fase da prospección xeofísica para descubrir o potencial arqueolóxico da Punta do Cabo
O Concello de Burela porá en marcha o próximo luns 3 de agosto a primeira fase da prospección xeofísica prevista na Punta do Cabo, un proxecto orientado a ampliar o coñecemento sobre o castro situado neste enclave mediante técnicas de investigación que non alterarán o terreo.
Antes do inicio das actuacións, o equipo técnico encargado da intervención manterá un novo encontro coa veciñanza de Burela do Cabo. A reunión, convocada para as 12.00 horas, servirá para aclarar as cuestións que puidesen xurdir tras a sesión informativa celebrada o pasado 15 de xullo entre a alcaldesa e os residentes da zona.
Unha vez rematada esa xuntanza, os especialistas iniciarán os primeiros traballos sobre o terreo coa colocación de pequenas estacas de madeira que permitirán xeorreferenciar o espazo. Posteriormente levaranse a cabo voos con dron, unha actuación imprescindible para recompilar datos que servirán de base á investigación.
Segundo explica o Concello, esta prospección permitirá explorar e cartografar o xacemento mediante métodos non invasivos, co propósito de obter información sobre a configuración e a posible extensión do castro de Punta do Cabo. Trátase dun enclave arqueolóxico que, ata o momento, non foi obxecto de estudos científicos deste tipo.
Esta primeira fase céntrase exclusivamente na obtención de información preliminar, sen realizar escavacións nin modificacións sobre o terreo. Os resultados permitirán definir con maior precisión as futuras actuacións e orientar as seguintes fases do proxecto de investigación arqueolóxica.