Comedia, memoria e vinganza no teatro amador de A Mariña
A programación de teatro amador impulsada pola Vicepresidencia da Deputación inclúe esta fin de semana catro representacións en Ribadeo, Cervo, Foz e A Pontenova, con propostas que van da comedia ao drama e que abordan cuestións como a realidade, a memoria, a familia e a vinganza.
A primeira cita será o sábado 17 de outubro, ás 19.00 horas, no salón de plenos da Casa do Concello de Cervo. Alí, o grupo A Mariña representará ‘A Historia dun Fidalgo para Sempre Lembrar’, unha versión particular das aventuras de Don Quixote. A obra presenta a Alonso, un fidalgo que decide converterse no célebre cabaleiro e emprender unha serie de aventuras acompañado de Sancha Panza, unha escudeira que tenta mantelo conectado coa realidade. A proposta combina situacións cómicas coa parte máis tráxica da historia, cando o protagonista volve ser Alonso e toma conciencia da súa propia realidade. A función está dirixida a todos os públicos.
Tamén o sábado, ás 19.00 horas, Foz acollerá ‘A Herencia de Xoana’, do grupo A Caxiga, no salón de actos da Asociación Cultural O Castro de Vilaronte. A peza, destinada ao público adulto, xira arredor da morte de Xoana, que acabou os seus días nunha residencia por non ter quen a coidase. Tras o seu falecemento, os seus achegados parecen máis preocupados pola herdanza que pola súa situación, aínda que o fillo e a neta sofren especialmente a perda. Xoana, porén, deixou preparado un testamento sorpresa para evitar que a esquezan axiña.
A programación continuará o domingo 18 en A Pontenova, onde o Colectivo Cultural Ollomao representará ‘Dona Clara’ ás 19.00 horas na Casa da Cultura. A obra, destinada ao público adulto, conta o regreso de Clara Zahanassian á vila onde pasou a infancia. Convertida nunha das mulleres máis ricas do mundo, ofrece mil millóns aos seus antigos veciños para axudalos a saír das dificultades económicas, pero a súa proposta leva aparellada unha condición difícil de aceptar. A historia afonda na vinganza e na maneira en que a pobreza e a tentación do diñeiro poden poñer a proba os principios dunha comunidade.
A última función desta programación terá lugar o domingo en Ribadeo. O grupo O Torques levará ‘O Randiña vai ao Médico’ ao Auditorio Municipal Hernán Naval ás 20.00 horas. Esta comedia, recomendada para maiores de 14 anos, segue as peripecias do protagonista despois de pasar moito tempo en lista de agarda para unha consulta médica. Mentres espera ser atendido, conta as súas experiencias e as dos seus veciños cando tiveron que acudir ao hospital, ata que finalmente marcha sen pasar pola consulta. Máis adiante regresa e consegue ser atendido polo doutor Romerales, que lle comunica os resultados das probas e as indicacións para mellorar a súa saúde.